A Xunta recoñece o traballo de seis centros de ensino no concurso Eduemprende Idea 2020
O certame ten como obxectivo potenciar a realización de proxectos empresariais polo alumnado das ensinanzas de FP, deportivas ou de artes plásticas e fomentar así o emprendemento
Resultaron premiados equipos de Pontevedra, Lugo, A Coruña e Vigo, que recibirán en total 12.000 euros e poderán incorporarse a un viveiro de empresas da Consellería de Educación e recibir asesoramento técnico do Igape
Santiago de Compostela, 24 de novembro de 2020.- A Xunta vén de resolver a concesión dos premios do concurso Eduemprende Idea 2020, o certame anual que busca estimular o emprendemento mediante a realización de proxectos empresariais polo alumnado das ensinanzas de FP, deportivas ou de artes plásticas e deseño.
Como publica hoxe o Diario Oficial de Galicia (DOG), os seis equipos de estudantes gañadores recibirán un total de 12.000 euros, poderán incorporarse a un viveiro de empresas da Consellería de Cultura, Educación e Universidade e recibir asesoramento técnico do Igape para desenvolver os seus proxectos.
O certame, que naceu en 2015 no marco do Plan de emprendemento no sistema educativo de Galicia (Eduemprende), ten como obxectivo implantar a cultura emprendedora na comunidade educativa. Así, busca dar resposta ás necesidades da sociedade e os cambios na concepción dos procesos de ensino e aprendizaxe, para reforzar os vínculos entre educación, empresa, investigación e innovación.
Os galardóns constan de dúas modalidades, A e B, dirixidas ao alumnado de ciclos de grao superior e de grao medio, respectivamente. En ambas as dúas modalidades o primeiro premio será de 3000 euros, o segundo de 2000 e o terceiro de 1000. Na modalidade A, dirixida a alumnado de ciclos de grao superior, resultaron premiados os seguintes centros e estudantes:
Premio | Centro | Proxecto | Autoría |
1º | IES Montecelo (Pontevedra) | Fulmar | Alba Meis Fernández Tana Fuentes Padín |
2º | CIFP Politécnico de Lugo | Agrolucus | Elías Blanco Castro Alejandro López Fontán |
3º | CIFP Someso (A Coruña) | Aqualar | Alejandro Calvelo Campelo Alejandro Davila Silva Carlos Filgueiras Díaz |
Na modalidade B, dirixida a alumnado de ciclos de grao medio, resultaron premiados os seguintes centros e estudantes:
Premio | Centro | Proxecto | Autoría |
1º | CIFP Carlos Oroza (Pontevedra) | Mimasa | Sandra Rodríguez Barreiro María Peón Lamas Emilia Marín Sousa |
2º | CIFP Manuel Antonio (Vigo) | Tolemia | Beatriz Domínguez Vázquez Marta Alonso Lago |
3º | IES Montecelo (Pontevedra) | Camiñando | Andrea Abal Martínez José Carlos Rodríguez Danoz Julián Sevilla Piedras |
As persoas participantes deberon achegar coa solicitude unha ficha das e dos integrantes do grupo (mínimo de 2 e máximo de 4) e un proxecto de empresa, así como un resumo executivo e un vídeo do mesmo. A comisión avaliadora tivo en conta, entre outras características, a viabilidade técnica, financeira e comercial dos proxectos presentados, así como a coherencia e o carácter innovador.