José González: "As Catas de Galicia permiten promocionar, identificar e premiar a tradición, o esforzo e dedicación de adegueiros e augardenteiros"

O conselleiro do Medio Rural, José González, presidiu hoxe a entrega dos premios das Catas de Galicia 2020, onde sinalou que este recoñecido certame permite promocionar, identificar e premiar a tradición, o esforzo e dedicación de adegueiros e augardenteiros. Así, felicitou a todos os participantes e, en especial, aos gañadores por elevar os viños galegos ao máximo prestixio, primando a súa calidade e dándose a coñecer polo mundo enteiro.

No acto de entrega, no que tamén participou o director da Axencia Galega da Calidade Alimentaria (Agacal), José Luis Cabarcos, o conselleiro agradeceu o compromiso deste sector tan estratéxico para Galicia que, ano tras ano, se consolida como unha aposta segura para o futuro do rural galego. Neste senso, cabe destacar que na nosa comunidade unen esforzos máis de 13.400 viticultores e 479 bodegas, capaces de xerar un valor económico anual que supera os 200 millóns de euros.

Así, o titular de Medio Rural fixo entrega dos premios ao Mellor Viño de Galicia , que este ano recaeron en “Pazo Lalón”, da bodega Pazo Lalón S.L. (DO Ribeiro) na categoría de brancos e “Ó Prómine Singular”, de bodegas Petrón S.L. (DO Ribeira Sacra) na categoría de tintos. Así mesmo, tamén se deron a coñecer os gañadores das catas de augardentes e licores tradicionais. O resto de galardóns entregáronse de xeito individualizado nas sedes dos consellos reguladores das cinco denominacións de orixe vitivinícolas debido ás medidas sanitarias pola covid-19.

Proceso de cata a cegas

Cómpre lembrar que os gañadores de cada categoría foron elixidos tras un rigoroso proceso de cata a cegas levado a cabo durante cinco días -entre o 26 e 30 de outubro- por un total de 21 expertos, 14 deles encargados de valorar os viños e outros sete encomendados para as augardentes e licores tradicionais. Así, tras a criba inicial, este panel de profesionais tivo que escoller entre 348 mostras de tintos e brancos pertencentes a 143 adegas e entre outras 25 de augardente, licor de herbas ou licor café correspondentes a oito empresas galegas.

Ademais, no que atinxe aos viños, recolléronse e identificáronse as botellas participantes nas súas respectivas bodegas, envolvéndoas en material opaco e introducíndoas posteriormente nunha caixa selada para garantir que as catas fosen totalmente a cegas. Así, só quedaba visible o nome da categoría na que participaban e se se trataba de viño branco ou tinto. Con respecto ás augardentes e aos licores tradicionais, recolléronse as mostras en envases idénticos de 3/8 de litro, para que tamén resultase imposible recoñecelos e identificalos, asegurando a máxima rigorosidade e anonimato.