As tarefas forman parte dos traballos que se veñen realizando nos últimos meses nas vías autonómicas para contribuír a previr lumes e reforzar a seguridade
A Xunta intensifica a vindeira semana os traballos de roza e limpeza en estradas da provincia de Ourense
Comezaranse os labores na área de Ourense, Allariz, Celanova, O Carballiño e O Ribeiro e nas zonas da Baixa Limia, Trives, Valdeorras e Viana de Bolo
Executaranse novos traballos de roza na estrada LU-862, no Vicedo e Viveiro
Continuarán as actuación nas zonas do Condado-Paradanta e Vigo-Baixo Miño; na vía de alta capacidade C.G.-4.2 en Tomiño e na Guarda; e na PO-010, que une a circunvalación de Vigo VG-20 co polígono industrial de Balaídos
Proseguirán as tarefas na autovía Ferrol-Vilalba, a AG-64, ao seu paso polo municipio das Pontes
As actuacións céntranse na retirada de especies pirófilas e nas rozas nas marxes das estradas, así como no acondicionamento das sendas para o tránsito peonil
A Xunta intensificará a vindeira semana os traballos de roza e limpeza nas marxes de distintas estradas de titularidade autonómica na provincia de Ourense.
En concreto, iniciaranse os traballos en estradas autonómicas da área de Ourense, Allariz, Celanova, O Carballiño e O Ribeiro; e das zonas de Baixa Limia, Trives, Valdeorras e Viana de Bolo. Ao tempo, continuarán os traballos xa iniciados nas vías autonómicas das zonas de Caldelas, Trives, Viana e na estrada OU-622, no Barco de Valdeorras.
A Consellería de Infraestruturas e Mobilidade, a través da empresa pública Seaga, vén realizando nos últimos meses estas tarefas de acondicionamento nas franxas de dominio público de vías autonómicas das catro provincias para previr lumes e reforzar a seguridade viaria.
Tamén a longo da vindeira semana se realizarán na provincia de Lugo os traballos de roza na estrada LU-862, no Vicedo e Viveiro e seguirán os traballos en marcha na vía de alta capacidade CG-2.2, en Lugo e no Corgo, e na estrada LU-232, en Lugo e Friol.
Proseguirán as actuacións, ademais, en distintas vías autonómicas da provincia de Pontevedra, nas zonas do Condado-Paradanta e Vigo-Baixo Miño, así como na vía de alta capacidade C.G.- 4.2, en Tomiño e na Guarda.
Tamén continúan as actuacións na vía de alta capacidade PO-010, que une a autoestrada de circunvalación de Vigo VG-20, no lugar de Balsa, co polígono industrial de Balaídos.
Na provincia da Coruña, seguirán os labores na autovía Ferrol-Vilalba, a AG-64, ao seu paso polo municipio das Pontes.
As tarefas que se veñen realizando céntranse na retirada de especies pirófilas, aquelas que son máis propensas á propagación do lume, coa fin de previr incendios forestais.
Tamén se acometen rozas para completar o traballo ordinario de conservación das estradas e reducir progresivamente o uso de herbicidas, dando cumprimento a un acordo parlamentario.
Ademais, realízase o acondicionamento de zonas verdes e sendas peonís, para que estean en condicións axeitadas.
As intervencións teñen como obxectivos potenciar o efecto cortalumes das estradas; aumentar a seguridade viaria, cunha maior visibilidade; e fomentar unha mobilidade máis segura e sustentable mediante as sendas e zonas verdes para o tránsito peonil.
Imaxes relacionadas
