O Sergas destaca que os novos órganos de participación dos pacientes facilitarán o traballo conxunto para a recuperación tras a pandemia
Na reunión do Consello Asesor de Pacientes do Servizo Galego de Saúde, o xerente do Sergas lembrou que, desde 2019, cada área sanitaria conta co seu propio órgano asesor, formado por asociacións de pacientes da súa contorna
A reforma da Lei de Saúde promovida pola Xunta en 2018 previu a posibilidade de creación destes órganos e a regulación e constitución de todos eles fíxose efectiva no primeiro trimestre de 2019
O Servizo Galego de Saúde convocou hoxe nunha sesión telemática do Consello Asesor de Pacientes, o seu órgano de asesoramento formado por máis de oitenta asociacións de pacientes de toda Galicia, e que representan a colectivos con diversas patoloxías. A reunión estivo presidida polo xerente do Sergas, José Flores, e contou coa presenza da directora xeral de Saúde Pública da Consellería de Sanidade, Carmen Durán.
No encontro, José Flores puxo en valor a participación activa das asociacións de pacientes na gobernanza do sistema público de saúde de Galicia, e destacou que a escoita activa das voces dos pacientes por parte dos xestores sanitarios “é un dos mellores mecanismos para mellorar a calidade da asistencia”, máxime nun momento como o actual, destacando que cando chegue a recuperación tras esta pandemia “será máis importante que nunca que o novo camiño que emprenda o Sergas o faga acompañado do voso consello e da vosa experiencia”.
Nese sentido, lembrou que, froito do éxito do modelo deste Consello Asesor creado no ano 2011, a Xunta de Galicia propuxo en 2018 unha reforma da Lei de Saúde de Galicia na que se incorporou a regulación da existencia de consellos asesores de pacientes en cada unha das áreas sanitarias.
Foro de interlocución
En outubro de 2018 aprobouse a orde reguladora destes consellos de área e abriuse o proceso para a incorporación de asociacións a estes consellos. Tras o debido proceso de tramitación das solicitudes, publicáronse as designacións das seleccionadas e, en marzo de 2019, estaba rematada a composición dos Consellos de Pacientes das sete áreas sanitarias.
Deste xeito, estes consellos contan con asociacións de nivel galego que achegan a súa visión ás particularidades de cada área e con asociacións locais que dispoñen agora dun foro formal de interlocución directa coa xerencia da súa área sanitaria. Estes órganos están a ser operativos e xa se reuniron varias veces desde a súa creación, superando, na meirande parte dos casos, a obrigada reunión anual que dispón a normativa.
Imaxes relacionadas
