Trátase de despexar o espazo para dotar a zona dunha residencia da terceira idade
A Xunta inicia as obras de demolición da actual terminal de autobuses de Ourense
A intervención conta cun investimento de máis de 523.000 e iníciase cos traballos previos de retirada do material do interior: desmontado de mobiliario, carpinterías, elementos de fontanería, instalación eléctrica e o resto de instalacións
Estes traballos realizaranse de xeito acompasado coas obras da nova estación de autobuses da intermodal no barrio da Ponte, que seguen a avanzar a bo ritmo
Este xoves instalaranse dúas grandes marquesiñas, que funcionarán como parada provisional, mentres non sexa trasladada a actividade á nova terminal
A actuación recolle a demolición da estrutura do edificio e o acondicionamento da parcela, sen necesidade da realización de voaduras
A Consellería de Infraestruturas e Mobilidade vén de iniciar hoxe as obras de demolición da actual terminal de autobuses de Ourense.
A actuación, cun investimento máis de 523.000 euros, comeza cos traballos previos de retirada do material de interior: desmontado de mobiliario, carpinterías, elementos de fontanería, instalación eléctrica e o resto de instalacións.
A demolición da actual terminal realizarase de xeito acompasado coas obras en execución da nova estación de autobuses da intermodal no barrio da Ponte, cuxos traballos seguen a avanzar a bo ritmo.
Para acometer esta obra, a Xunta prevé instalar este xoves dúas grandes marquesiñas, que funcionarán como parada provisional, mentres non sexa trasladada a actividade á nova estación.
A actual estación de autobuses foi construída hai máis de 30 anos. Dadas as súas condicións e tendo en conta o custo que suporía a súa adecuación a outro uso, así como a inconveniencia de deixar un edificio destas dimensións desocupado nunha zona urbana, a Xunta decidiu redactar un proxecto de demolición.
A intervención ten como obxectivo deixar despexado o solar e aproveitar este espazo para dotacións de carácter social, concretamente, para a construción dunha residencia da terceira idade.
O programa de traballo
As tarefas que se están a iniciar no interior da actual terminal de autobuses continuarán, una vez completado o desmontado dos distintos elementos, coa demolición de tabiques, pavimentos e revestimentos. A continuación, cando queden completamente baleiros o andar baixo e o primeiro, procederase á demolición e desmonte das cubertas superiores.
Para efectuar as intervención primarase o uso de retroescavadoras e grúas móbiles con acoples especiais de derribo, polo que non se considera necesaria a realización de voaduras nin de microvoaduras.
As obras incluirán o acondicionamento posterior da parcela e a xestión dos correspondentes residuos xerados pola demolición.