Feijóo salienta que os programas de axuda postos en marcha no marco do Plan de reactivación achéganse xa aos 270 millóns con máis de 30.000 solicitudes

O presidente do Goberno galego, Alberto Núñez Feijóo, destacou hoxe que os programas de axuda postos en marcha no marco do Plan de reactivación e dinamización de Galicia achéganse xa aos 270 millóns de euros, con máis de 30.000 solicitudes.

Durante a asemblea da Confederación Empresarial de Ourense, na que participou telematicamente, Feijóo recordou que no marco deste plan aprobáronse, entre outras medidas: unha liña específica de préstamos de ata 200.000 euros que beneficiaron a 2.200 empresas e microcréditos cos que se bonificou o 100% dos xuros a pemes e autónomos; o aprazamento das cotas de amortización dos préstamos con Igape e XesGalicia; e vacacións fiscais de impostos da Comunidade autónoma ata novembro.

Así mesmo, axilizouse o pago a provedores; activouse o servizo Igape Responde, que se converteu nunha xanela única para asesorar a todo o tecido empresarial e, de maneira singular, aos emprendedores; aprobáronse axudas para completar as prestacións de menor contía dos traballadores por ERTES e para as persoas a partir de 55 anos que perderon o seu emprego; e puxéronse en marcha medidas de conciliación.

Diálogo e traballo conxunto

Ao longo da súa intervención, o responsable do Goberno galego referiuse tamén aos elementos necesarios para afrontar os retos impostos pola pandemia, entre os que destacou: dar continuidade á Industria 4.0; e seguir impulsando sectores estratéxicos como a automoción, o naval, o agroalimentario e o forestal, e aqueles con potencial de crecemento como o aeroespacial ou o biotecnolóxico. “E concretamos tres proxectos tractores que temos deseñados e que presentaremos ao fondo de reconstrución europeo”, engadiu, incidindo en que para acadar todos estes obxectivos a ferramenta clave é o diálogo e o traballo conxunto.

Con este fin, resaltou que a Xunta modificou e reforzou a súa estrutura departamental, creando unha Consellería de Emprego e Igualdade e cunha Vicepresidencia económica; “e outra ferramenta que estamos utilizando é o Parlamento, coa creación dunha Comisión para a reactivación da economía. E espero que todos os grupos esteamos á altura, porque é o momento de acordar e non de discutir”, engadiu.

Se ben a Comunidade galega está a resistir mellor que a media española, cunha caída do PIB 3 puntos inferior á caída experimentada polo conxunto de España, Feijóo aseverou que queda moito traballo por facer xuntos. Ao respecto, indicou que para reactivar a economía o Goberno galego seguirá traballando para mandar unha mensaxe de estabilidade e de confianza, “para seguir creando emprego, para seguir creando empresas e para outorgar confianza aos investidores”.