A Xunta destaca que a era poscovid vai ser a era do coñecemento, polo que o talento será o gran activo das empresas galegas

O vicepresidente económico e conselleiro de Economía, Empresa e Innovación, Francisco Conde, asistiu hoxe na Coruña ao acto de clausura académica da Escola de Finanzas Business School 2019-2020, onde destacou que a era poscovid vai ser a era do coñecemento, polo que o talento será o gran activo do tecido empresarial galego.

Conde apuntou que o reto ao que se enfrontan actualmente as pemes e a industria como resposta á pandemia, ademais de ser moi estritas cos plans de prevención, é o de acelerar o seu ritmo de transformación dixital. Nese sentido, sinalou que a formación se converte, así, nun requisito indispensable non só como porta de entrada ao mercado laboral senón no seo das propias empresas, que van ter que reorganizar os procesos de traballo e fomentar procesos de reciclaxe e de capacitación profesional nos seus cadros de persoal.