A Xunta de Galicia licita a construción da nova escola infantil da Guarda, que contará con 41 prazas

A conselleira de Política Social, Fabiola García, informou hoxe que a Xunta de Galicia ten en licitación a construción da nova escola infantil da Guarda, que contará con 41 prazas. Fíxoo durante a visita que realizou esta mañá en compañía do alcalde deste municipio, Antonio Lomba, ao lugar onde se emprazará o centro.

A conselleira de Política Social explicou que a partir de hoxe xa se poden presentar as propostas para a construción das novas instalacións, que se localizarán no antigo colexio Manuel Rodríguez Sinde.

A nova escola da Guarda, que se integrará na rede pública autonómica, terá tres unidades e 41 prazas, o que permitirá aumentar a ratio de atención infantil ata o 48%, 15 puntos superior ao recomendado pola Unión Europea. A súa construción e equipamento contan cun orzamento de 760.000 euros, dos que o Goberno galego achega 480.000 euros e a Administración local os 280.000 euros restantes.

En concreto, as obras consistirán na reforma da antiga vivenda dos mestres e do vello comedor, sobre os que se levantará unha nova planta. Deste xeito, o edificio contará cunha superficie de 680 m2 que se distribuirá en tres aulas, un espazo de usos múltiples, aseos, unha cociña e estancias de uso exclusivo do persoal.

Fabiola García subliñou que o compromiso da Xunta por facer de Galicia o mellor lugar para formar unha familia ratifícase en servizos como a futura escola infantil da Guarda. Así mesmo, agradeceu a implicación do Concello para facer posible este recurso, que mellorará a atención educativa e facilitará a conciliación familiar das veciñas e veciños do municipio.