A Xunta adxudica as obras de mellora da entrada do Camiño Portugués en Santiago ao seu paso pola rúa Escurridía e a Ponte Vella
Estas actuacións, adxudicadas por un importe de case 196.000 euros, comezarán en setembro e terán un prazo de 3 meses
As obras consisten en reordenar o cruce da rúa da Escurridía coa da Ponte da Rocha e a rúa Volta do Castro mellorando o tránsito dos peregrinos e peóns
Esta intervención complementa as obras de mellora da chegada a Compostela do Camiño Portugués que se están a desenvolver no barrio de Conxo
A Xunta vén de adxudicar as obras de mellora da entrada do Camiño Portugués en Santiago, no treito entre a rúa Escurridía e a Ponte Vella, no barrio compostelán de Conxo.
Estas actuacións, adxudicadas á empresa Explotaciones Gallegas S.L. por un importe de case 196.000 euros, terán un prazo de execución de 3 meses.
Os traballos poderán comezar en setembro e prevese a súa finalización para este mesmo ano.
Este proxecto ten por obxecto lograr unha visión integral do Camiño de Santiago como fenómeno patrimonial, cultural e territorial único, independentemente dos diferentes itinerarios que conflúen no centro histórico compostelán.
Trátase de reordenar o cruce da rúa da Escurridía coa rúa da Ponte da Rocha e a rúa Volta do Castro mellorando o tránsito e a seguridade dos peregrinos e peóns.
As principais actuacións previstas inclúen a separación clara de espazos exclusivos para peóns do resto do tráfico rodado, a reordenación do cruce da rúa da Volta do Castro con espazos de uso mixto e a ordenación renovada e humanización das seccións viarias existentes. Tamén inclúe a definición de elementos como pavimentación ou mobiliario.
Ao longo de toda a actuación intentarase manter unha sección mínima de ancho suficiente para a separación do tránsito peonil do rodado. No caso de non ser posible nalgúns dos treitos, seguirase o criterio de plataforma compartida, reparándose o firme pero sempre dándolle prioridade ao viandante e elevando o nivel das zonas peonís.
Nos treitos onde sexa posible, ampliarase a plataforma, permitindo xerar pequenos espazos de estancia que serán humanizados con elementos de arborado ou mobiliario urbano.
No cruce entre a rúa da Volta do Castro coa rúa da Ponte da Rocha manterase o trazado actual e executarase un paso elevado en formigón para paso de peóns e peregrinos. Isto farase con ramplas no comezo e final desta zona para controlar a velocidade de circulación dos vehículos na intersección e reforzar a predominancia do peón.
Esta intervención complementa as obras de mellora da chegada a Compostela do Camiño Portugués que se están a desenvolver no barrio de Conxo.