Medio Rural informa aos veciños de Godos (Caldas de Reis) dos avances nesta parcelaria, na que se vén de autorizar a toma de posesión provisional dos novos predios
Técnicos da Consellería reuníronse hoxe cos membros da Xunta Local desta reestruturación para explicarlles estes avances no proceso e atender as dúas dúbidas e suxestións
O director xeral de Desenvolvemento Rural vén de asinar o trámite que permitirá aos titulares das parcelas entrar nos predios concentrados o vindeiro 15 de novembro
Técnicos da Consellería do Medio Rural reuníronse hoxe cos membros da Xunta Local da parcelaria de Godos (Caldas de Reis) para explicarlles os avances neste proceso e atender as súas dúbidas e suxestións. Así, déuselles conta de que o director xeral de Desenvolvemento Rural, Miguel Pérez Dubois, vén de autorizar a toma de posesión provisional dos novos terreos, un trámite que permitirá aos veciños acceder aos predios de reemprazo o vindeiro 15 de novembro.
A reestruturación parcelaria de Godos beneficia a 599 propietarios, que contaban ao inicio do proceso con 3.548 parcelas, nunha superficie total de 388 hectáreas. A día de hoxe hai 1.159 predios de reemprazo, cun redimensionamento que lles permitirá aos titulares facer os seus terreos máis operativos e competitivos.
A Xunta, a través da Consellería do Medio Rural, leva investidos un total de 2,8 millóns de euros neste proceso, contemplando tanto os traballos nas redes de camiños principais e secundarios (de case 30 quilómetros de extensión) como o acondicionamento de predios, xunto coas asistencias técnicas necesarias para levar adiante a reorganización.