A Consellería do Medio Rural informa da situación dos lumes forestais con datos recollidos ata as 9,00 h de hoxe
Permanece activo o lume do municipio ourensán de Lobios, parroquia de Manín, no que faleceu o piloto dun hidroavión portugués e o copiloto resultou ferido, e que afecta unhas 420 hectáreas do Parque Natural Baixa Limia-Serra do Xurés
Tamén no parque natural, seguen controlados dous incendios en Muíños, parroquia de Requiás, cunhas 51 hectáreas afectadas en total, e foi extinguido un lume en Lobeira, parroquia de San Xes de Vilariño, que afectou 6 hectáreas
Extinguidos os lumes rexistrados nos municipios de Toén (moreiras) e Chandrexa de Queixa (Requeixo) que afectaron 220 e 22 hectáreas respectivamente
A Consellería do Medio Rural informa da situación dos lumes forestais rexistrados con datos recollidos ata as 9,00 h. de hoxe.
Lobios
Permanece activo, aínda que evoluciona favorablemente, o incendio rexistrado no concello ourensán de Lobios, parroquia de Manín, tras comezar o sábado ás 8,00 h. e despois de entrar dende Portugal. Segundo as últimas estimacións, o lume afecta unhas 420 hectáreas do Parque Natural Baixa Limia-Serra do Xurés. Esta medición é provisional ata que se parametrice a superficie final afectada.
No control deste incendio levan traballado 1 técnico, 19 axentes, 54 brigadas, 29 motobombas, 2 pas, 9 avións e 11 helicópteros, así como efectivos da Unidade Militar de Emerxencias (UME). Foi neste lume onde se accidentou un hidroavión do operativo de extinción portugués, no que faleceu unha persoa e outra resultou ferida.
Muíños
Permanece controlado dende as 10,09 h. de onte un novo lume no concello ourensán de Muíños, parroquia de Requiás, que tamén afecta o Parque Natural Baixa Limia-Serra do Xurés. Orixinouse ás 1,07 h. da madrugada do luns e, segundo as primeiras estimacións, rolda 1 hectárea rasa. Lévanse mobilizado para o seu control 3 axentes, 7 brigadas e 5 motobombas.
Así mesmo, segue controlado o lume dese mesmo concello ourensán de Muíños, tamén na parroquia de Requiás, que se iniciara o venres e que afecta provisionalmente unhas 50 hectáreas de superficie. Para a súa extinción lévanse mobilizado 6 axentes, 24 brigadas, 16 motobombas, 1 pa, 9 avións e 7 helicópteros.
Lobeira
Extinguido ás 1,32 h. desta madrugada o lume que se orixinara na tardiña de onte no concello ourensán de Lobeira, parroquia de San Xes de Vilariño. Segundo as últimas medicións, afectou 6 hectáreas do Parque Natural Baixa Limia-Serra do Xurés: 5 rasas e 1 ha arborada. No seu control traballaron en total 3 axentes, 9 brigadas, 3 motobombas, 6 avións e 3 helicópteros.
Toén
Extinguido onte ás 21,04 h. o lume rexistrado no concello de Toén, parroquia de Moreiras, tras comezar o pasado venres. Segundo as últimas medicións, a superficie afectada foi de 220 hectáreas, das cales 132 foron arboradas e 88 de monte raso. Na súa extinción participaron 3 técnicos, 17 axentes, 44 brigadas, 29 motobombas, 3 pas, 12 avións e 9 helicópteros, así como efectivos da Unidade Militar de Emerxencias (UME).
Chandrexa de Queixa
Tamén quedou extinguido ás 20,15h. de onte o incendio do municipio de Chandrexa de Queixa, parroquia de Requeixo. Orixinárase o sábado e, segundo as últimas medicións afectou unha superficie de 22 hectáreas de monte raso. Nos labores de extinción participaron 7 axentes, 16 brigadas, 2 motobombas, 2 avións e 3 helicópteros.
A Consellería do Medio Rural lembra que está a disposición da cidadanía o número de teléfono gratuíto 085, ao que deben chamar en caso de detectar algún lume forestal. Ademais, existe un teléfono anónimo e gratuíto para denunciar calquera actividade delituosa incendiaria da que se teña sospeita ou coñecemento: 900 815 085. Así mesmo, toda a información actualizada sobre incendios forestais poderá ser consultada na conta aberta de twitter: @incendios085.