A xornada técnica sobre maquinaria para a mecanización da horta aprázase ata o 10 de setembro e terá lugar no CFEA de Sergude

A xornada técnica sobre maquinaria para a mecanización da horta que ía celebrarse este xoves no Centro de Investigacións Agrarias de Mabegondo (CIAM) queda aprazada ata o vindeiro día 10 de setembro, a causa das restricións pola covid-19 na área sanitaria da Coruña, á que pertence o municipio de Abegondo, no que ten a súa sede o CIAM.

Ademais, decidiuse por parte da Consellería do Medio Rural -organizadora do evento, a través da Axencia Galega da Calidade Alimentaria (Agacal)- que a xornada teña lugar nas instalacións do Centro de Formación e Experimentación Agroforestal (CFEA) de Sergude, situado no concello coruñés de Boqueixón.

A xornada, que inclúe demostracións con distintos tipos de equipos, levarase a cabo nun momento de incremento da demanda de diferentes maquinarias para poder mecanizar certas tarefas do agro, así como para buscar sistemas de produción máis eficientes ou que minimicen a utilización de fitosanitarios. Desta forma, cada vez máis agricultores buscan equipos que non só lles faciliten o labor diario, senón que tamén poidan axudalos a aforrar, ao tempo que teñen a capacidade de adaptarse aos distintos tipos de solo ou ás irregularidades do terreo.

A acción formativa constará dunha sesión teórico práctica para mostrar o funcionamento e as particularidades dunha serie de máquinas, facendo fincapé na posibilidade de combinación entre elas para reducir o tempo de traballo ou o consumo de enerxía. Entre os equipos que se empregarán na demostración, estarán un canón nebulizador, unha transplantadora ou distintos tipos de fresas. Tamén unha sementadora, unha binadora e unha trituradora de cultivos.

A actividade está dirixida aos produtores e técnicos de horta, ás cooperativas e asociacións de horticultores, ás escolas de formación agraria e ás empresas de servizos agrícolas. Así mesmo, poden acudir representantes dos talleres de maquinaria para o agro, así como mozos en fase de incorporación á actividade agraria.

O principal obxectivo do Plan de formación ao agro galego é impulsar as actividades formativas, de demostración e información que desenvolve a Consellería do Medio Rural. Así, trátase de mellorar a capacitación dos traballadores dos sectores agrario, gandeiro, agroalimentario e forestal en todo o relacionado cos aspectos técnicos e económicos das súas actividades incidindo, cando sexa preciso, na reordenación das producións e no emprego de métodos respectuosos coa conservación e a protección do medio.