A Xunta incrementa as axudas dirixidas ás galerías de arte que participan en feiras e mercados fóra de Galicia

O Diario Oficial de Galicia (DOG) vén de publicar a orde pola que se establecen as bases para apoiar ás galerías de arte na súa participación en feiras e mercados de arte fóra da Comunidade galega. Trátase dunha medida que se enmarca no Plan de reactivación para os sectores cultural e turístico da Xunta de Galicia que este ano incrementa en 50.000 euros a súa dotación ata chegar aos 85.000 euros ¬e da que se poderán beneficiar os profesionais que asistiron a este tipo de eventos na etapa anterior ao covid-19 ou que o farán nos vindeiros meses.

Este é o segundo ano que se convoca unha liña de subvencións específica para este tipo de proxección, o que amosa por unha banda o apoio a arte contemporánea a través do traballo das galerías de arte, e pola outra, o compromiso coa internacionalización da proxección exterior da cultura galega. Así, tal e como recolle o DOG, no caso de que a asistencia sexa a feiras celebradas en España, pero fóra de Galicia, os beneficiarios recibirán un máximo de 4.000 euros, o que supón o dobre que o establecido na orde do pasado exercicio. As subvencións tamén se incrementan no caso de que os profesionais asistan a eventos internacionais pasando dos 4.000 euros máximos fixados en 2019 aos 6.000 que poden recibir nesta edición.

O prazo para a presentación de solicitudes será dun mes contado a partir de hoxe e poderán ser beneficiarias da subvención as persoas dedicadas á actividade de produción e distribución de bens ou servizos culturais de carácter privado, titulares de galerías de arte, que desenvolvan as súas actividades no ámbito da Comunidade Autónoma de Galicia, que teñan asistido e participado nunha feira ou mercado de arte fóra da Comunidade entre o 1 de xaneiro e o 15 de novembro.

Sector fundamental
As galerías de arte constitúen un sector fundamental e contribúen a promover e difundir novos valores artísticos, tanto no resto de España como no estranxeiro máis alá da súa actividade comercial. Co obxectivo de propiciar a asistencia destes profesionais a eventos internacionais, o Goberno galego decidiu incluír estas axudas no Plan de reactivación para os sectores cultural e turístico que, no marco das medidas culturais, inclúe unha batería específica para apoiar o traballo destas entidades, así como a labor das artes plásticas.

Dentro das medidas creadas para reactivar as artes plásticas inclúense tamén a adquisición de obras a artistas galegos, as axudas para os creadores visuais (artistas e comisarios), a celebración dunha nova edición do Encontro de Artistas Novos (EAN) que se celebrará no mes de agosto na Cidade da Cultura co obxectivo de potenciar novos talentos, e o apoio ás actividades desenvolvidas pola Asociación Contemporánea de Galerías de Arte de Galicia.