A Consellería do Medio Rural informa da situación dos lumes forestais con datos recollidos ata as 9,00 h de hoxe
Desactivada a Situación 2 no incendio do concello ourensán de Monterrei, parroquia de Flariz, que permanece activo e, segundo novas estimacións, afecta provisionalmente unhas 450 hectáreas
Continúa activo o lume do concello ourensán de Viana do Bolo, parroquia de Vilardemilo, que segundo as últimas estimacións afecta unha superficie provisional de 250 hectáreas
Mantense controlado o lume do municipio ourensán de Verín, parroquia de Queirugás, que afecta unha superficie provisional de 144 hectáreas
A Consellería do Medio Rural informa da situación dos lumes forestais con datos recollidos ata as 9,00 h. de hoxe.
Monterrei
Desactivada a Situación 2 no incendio do municipio ourensán de Monterrei, parroquia de Flariz, que se declarara a pasada noite como medida preventiva pola proximidade do lume ao núcleo da Salgueira. O incendio permanece activo desde que se orixinou ás 17,05 h. de onte e, segundo as últimas estimacións coa apertura do día, afecta unha superficie provisional dunhas 450 hectáreas. Para o seu control mobilizáronse polo de agora 1 técnico, 11 axentes, 21 brigadas, 18 motobombas, 2 pas, 7 helicópteros e 9 avións, así como efectivos da Unidade Militar de Emerxencias (UME).
Viana do Bolo
Continúa activo desde as 20,28 h. do xoves o incendio forestal do municipio ourensán de Viana do Bolo, parroquia de Vilardemilo. De acordo coas últimas estimacións, afecta unha superficie provisional de 250 hectáreas.
Ao iniciarse este lume localizáronse ata cinco focos diferentes, polo que todo indica que foi intencionado. Ademais, cómpre lembrar tamén que se rexistrou a unhas horas nas que os medios aéreos apenas puideron traballar, pola proximidade do ocaso. Para o control deste incendio mobilizáronse ata o de agora 1 técnico, 16 axentes, 44 brigadas, 20 motobombas, 2 pas, 8 helicópteros e 8 avións.
Verín
Permanece como controlado desde as 14,43 h. de onte o incendio do concello ourensán de Verín, parroquia de Queirugás, que se iniciara o mércores. Segundo as últimas estimacións, afecta unha superficie provisional de 144 hectáreas. Neste lume levan traballado ata o momento 1 técnico, 16 axentes, 30 brigadas, 14 motobombas, 2 pas, 10 helicópteros e 9 avións.
A Consellería do Medio Rural lembra que está a disposición da cidadanía o número de teléfono gratuíto 085, ao que deben chamar en caso de detectar algún lume forestal. Ademais, existe un teléfono anónimo e gratuíto para denunciar calquera actividade delituosa incendiaria da que se teña sospeita ou coñecemento: 900 815 085. Así mesmo, toda a información actualizada sobre incendios forestais poderá ser consultada na conta aberta de twitter: @incendios085.