A Xunta adxudica as obras de mellora do firme en varias estradas autonómicas nas comarcas de Arzúa, Terra de Melide e Betanzos
A actuación, adxudicada por un importe de máis de 880.000 euros, conta cun prazo de execución de 5 meses e o obxectivo é iniciala a finais de xullo
Melloraranse as condicións de circulación nas estradas AC-231 e AC-840 ao seu paso polos concellos de Aranga, Curtis, Sobrado, Betanzos, Oza-Cesuras, Curtis, Vilasantar e Boimorto
Os traballos consistirán na rehabilitación da capa de rodadura para prolongar a vida útil do pavimento destas estradas, a limpeza de cunetas e a reposición da sinalización horizontal e vertical
A Consellería de Infraestruturas e Mobilidade vén de adxudicar as obras de mellora do firme en varias estradas de titularidade autonómica nas comarcas de Arzúa, Terra de Melide e Betanzos.
Esta actuación, adxudicada por un importe de máis de 880.000 euros á empresa F. Gómez y Cía S.L, conta cun prazo de execución de 5 meses. O obxectivo é poder iniciar as obras a finais de xullo.
O obxectivo da intervención é a mellora das condicións de circulación nas estradas de titularidade autonómica AC-231, ao seu paso polos municipios de Aranga, Curtis e Sobrado, e na estrada AC-840, ao seu paso polos concellos de Betanzos, Oza-Cesuras, Curtis, Vilasantar e Boimorto.
Máis en concreto, o contrato recolle a rehabilitación do firme nos tramos que presenten carencias para prolongar a vida útil do pavimento, mediante o fresado e reposición do firme existente con mestura bituminosa en quente ou o seu recrecido con microaglomerados segundo as necesidades.
Así mesmo, prevese a limpeza de cunetas e a reposición de sinalización horizontal. Tamén se inclúen pequenas partidas de sinalización vertical, cunetas e barreira de seguridade.