A Xunta e a hostalería pontevedresa coinciden en reforzar a aposta pola formación como garantía de recuperación laboral

O director xeral de Orientación e Promoción Laboral, Pablo Casal, mantivo esta mañá un encontro telemático cos responsables do Programa Integrado de Emprego (PIE) da Asociación Provincial de Empresarios de Hostalería e Turismo de Lugo.

Casal supeditou a recuperación económica e laboral a apostar pola formación, que permitirá contar con profesionais mellor cualificados, respondendo así ás demandas dos mercados laborais poscovid-19. Deste xeito, o director chamou a incentivar un modelo educativo dual e flexible que traballe pola inserción laboral, e que polo tanto contribúa a reforzar o tecido empresarial da hostalería pontevedresa (en especial pemes e autónomos), definindo perfís especializados neste sector.

O responsable de Orientación e Promoción Laboral sinalou aos Programas Integrados de Emprego como oportunidade para a mellora da empregabilidade, diversificando as competencias dos seus participantes. Neste sentido, Casal asegurou que a vontade da Xunta é a finalización práctica do curso, que se adaptou a un formato virtual por mor da pandemia, e que verá reactivada a formación presencial a partir do vindeiro 1 de xullo, prorrogando o calendario lectivo conforme ás leccións adiadas e axustándose aos criterios sanitarios necesarios.

O PIE da Federación Provincial de Empresarios de Hostalería de Pontevedra conta coa participación de 100 alumnos, todos eles en situación de desemprego e pertencentes a diversos colectivos sociais. O alumnado recibe formación en operacións básicas de hostalería, ademais de contar con aprendizaxe transversal en competencias dixitais (TIC, redes sociais, etc.) e idiomas. Inclúe tamén a posibilidade de realizar prácticas profesionais en establecementos hostaleiros, así como facilidades para a conciliación laboral e familiar.