A Xunta insta ao tecido empresarial ourensán a potenciar a formación de calidade como motor da economía e da empregabilidade no novo escenario poscovid-19

O director xeral de Orientación e Promoción Laboral, Pablo Casal, reuniuse esta mañá de maneira telemática con responsables do Programa Integrado de Emprego (PIE) da Confederación Empresarial de Ourense.

Durante o encontro, o director salientou a importancia de apostar por unha formación e unha educación de calidade para garantir o fortalecemento do tecido empresarial ourensán, garantindo unha mellora no nivel de empregabilidade, reforzando a competitividade dos traballadores e contribuíndo á reactivación económica no novo escenario económico poscovid-19. Do mesmo xeito, Casal quixo manifestar o compromiso da Xunta para a conclusión académica do programa, prorrogando os prazos lectivos equivalentes ao período de suspensión motivado pola pandemia, e apuntando ao deseño dunha planificación que permita a recuperación das clases presenciais, que realizaron de xeito virtual durante o tempo de reclusión.

O PIE ourensán conta coa participación de 100 usuarios en situación de desemprego ou perceptoras da renda de inclusión social de Galicia. A programación está destinada á obtención de certificados de profesionalidade en áreas como actividades auxiliares de almacén, postos de apoio no comercio ou responsabilidades administrativas na relación cos clientes. O curso lectivo inclúe cursos de idiomas, traballo con drons e mellora nas competencias dixitais, incluíndo a creación dunha páxina web propia ou o fomento da proxección comercial virtual.