A Xunta anima aos hostaleiros pontevedreses a impulsar a formación como panca para fortalecer a reactivación do sector

O director xeral de Orientación e Promoción Laboral, Pablo Casal, participou esta mañá nun encontro telemático con participantes do Programa Integrado de Emprego (PIE) da Federación Provincial de Empresarios de Hostalería de Pontevedra, destinado a persoas menores de 30 anos desempregadas, parados maiores de 45 anos e mulleres sen ocupación laboral.

Durante o encontro, Casal salientou o valor da formación e a educación de calidade como estímulos para a inserción laboral e o fortalecemento do tecido empresarial pontevedrés, especialmente pemes e autónomos, no novo escenario económico poscovid-19, supeditando a mellora da empregabilidade a unha potenciación das competencias que responda ás novas dinámicas de emprego poscovid-19. Así mesmo, o director quixo manifestar o apoio da Xunta á conclusión práctica do curso, ampliando os prazos lectivos equivalentes ao período de suspensión motivado pola pandemia, e manifestando a vontade de deseñar unha planificación que permita o reinicio da actividade presencial do PIE, que se mantivo en liña durante o estado de alarma.

Esta acción formativa da Federación Provincial de Empresarios de Hostalería de Pontevedra conta coa participación de 100 usuarios, que reciben formación en operacións básicas de bar e restaurante, cociña, ofertas gastronómicas e sistemas de aprovisionamento, ademais de prácticas laborais en establecementos de hostalería. Do mesmo xeito, a formación que actualmente se está impartindo en liña inclúe aprendizaxe en competencias dixitais, novas tecnoloxías, habilidades sociolaborais e programas de idiomas.