A Xunta adxudica a execución dunha senda peonil na estrada OU-310 ao seu paso por Vilardevós
As obras, adxudicadas por un importe duns 30.000 euros, comezarán nas vindeiras semanas e contan cun prazo de execución de 3 meses
Trátase de construír un novo treito de senda nunha zona onde existen vivendas lindeiras coa estrada á que non chega a actual beirarrúa, completando un itinerario peonil accesible na marxe dereita da vía autonómica
A senda terá de anchura inicial 2,50 metros, como a beirarrúa existente, e o final do itinerario será de 1,80 metros para enlazar co tramo seguinte
A Consellería de Infraestruturas e Mobilidade vén de adxudicar a execución dunha nova senda peonil na estrada de titularidade autonómica OU-310, entre os puntos quilométricos 13+300 e 13+440, no concello de Vilardevós.
Esta actuación, adxudicada por un importe duns 30.000 euros á empresa Construcciones y Almacenes Manuel Viso e Hijos SL, comezará nas vindeiras semanas. As obras teñen un prazo de execución estimado de 3 meses.
Trátase de construír un novo treito de senda na OU-310 ao seu paso por este municipio, que complementa á executada na marxe esquerda da estrada, entre os puntos quilométricos 13+180 e 13+600.
Os traballos permitirán dar continuidade e completar un itinerario peonil accesible na marxe dereita da vía autonómica, na contorna dos puntos quilométricos 13+300 e 13+440, onde existen vivendas lindeiras coa estrada ás que non chega a actual beirarrúa existente nesa marxe.
Nun primeiro tramo darase continuidade á beirarrúa existente, desde o punto quilométrico 13+305, onde finaliza na actualidade a beirarrúa de 2,50 metros. Este primeiro tramo chegará ata o punto 13+320 cunha senda de anchura inicial 2,50 metros, ao igual que a beirarrúa existente. A anchura final do itinerario será de 1,80 metros para enlazar co tramo seguinte.
Unha vez superado o cruzamento do camiño de acceso do punto quilométrico 13+320, a senda converterase ata o final da actuación nunha senda-cuneta tendida.