A Xunta apoia a expansión das empresas galegas en México a través dun novo encontro en liña
O próximo martes 9 celebrarase a segunda videoconferencia do ciclo que afonda tamén nas oportunidades para as exportacións galegas en China, Estados Unidos, Marrocos, Perú, Reino Unido, Israel e India
Representantes das oficinas empresariais da Administración autonómica e compañías galegas con implantación nestes oito mercados informan ás pemes participantes sobre os servizos dispoñibles e ofrecen claves para impulsar ou mellorar as vendas no exterior
Está activo tamén o programa formativo online gratuíto de apoio á internacionalización dixital dirixido a autónomos e pemes, enmarcado no Plan de dixitalización que vén de activar o Goberno galego
O vindeiro martes 9 de xuño terá lugar o segundo dos encontros online do ciclo Webinars País, que está a achegar videoconferencias ao tecido empresarial galego co obxectivo de afondar nas oportunidades de negocio en oito destinos mundiais. O webinario que terá lugar a próxima semana centrarase nas vendas en México, e as empresas interesadas en participar poden inscribirse no seguinte enlace: Webinars País: México.
Este encontro súmase ao xa celebrado sobre China e os que proximamente abordarán os mercados de Perú, Marrocos, Estados Unidos, Reino Unido, Israel e India, nos que representantes das diferentes oficinas empresariais do Igape nforman ás pemes participantes sobre os servizos gratuítos que poñen á disposición do tecido produtivo.
Ademais, compañías galegas con implantación neses destinos achegan as claves para impulsar ou mellorar as exportacións cara a eles e ofrecen análises dos retos e oportunidades que a nova situación económica mundial presenta. No vindeiro encontro serán representantes das empresas galegas Optare Solutions e Grupo Ramón García, con actividade comercial en México, e do Icex e a Asociación Nacional de Fabricantes de Conservas de Pescados e Mariscos (Anfaco-Cecopesca) os que abordarán as estratexias máis axeitadas para o mellorar a presenza comercial das pemes galegas no mercado mexicano.
Para potenciar a presenza exterior da produción galega, están tamén activas as actividades do programa formativo online gratuíto de apoio á internacionalización dixital que se dirixe a autónomos e pemes que queren abordar cambios nas súas estratexias de introdución e consolidación das vendas nos mercados exteriores. Desde o pasado venres desenvólvense os oito talleres de orientación práctica e titorías individuais con expertos, coa que se facilita aos participantes capacitación neste eido, un servizo personalizado de orientación e o acceso á rede de contactos profesionais do Igape en diferentes países.
A iniciativa enmárcase no Plan de dixitalización que o Goberno galego vén de activar –e co que se prevé a mobilización de 40 millóns de euros en Galicia– para facilitar a reactivación do tecido empresarial e a súa adaptación á actual situación que se deriva da covid-19.
Datas previstas dos próximos webinarios
Perú: martes 23 de xuño.
Marrocos: martes 7 de xullo.
Estados Unidos: martes 21 de xullo.
Israel: martes 8 de setembro.
Reino Unido: martes 22 de setembro.
India: martes 6 de outubro.