Un total de dezanove empresas presentan as súas ofertas para a execución dunha nova cuneta na autovía AG-64, no concello das Pontes
A intervención, licitada por máis de 583.000 euros, ten un prazo de execución de 6 meses e comezará no verán
As obras desenvolveranse entre os puntos quilométricos 35+300 e 36+700 e consistirán na construción dunha cuneta nova para reforzar a seguridade viaria
A actuación tamén resolverá os problemas actuais das augas de escorrentía procedentes dos noiros e da mediana
Un total de dezanove empresas veñen de presentar as súas ofertas para acometer as obras de execución dunha nova cuneta na autovía Ferrol-Vilalba (AG-64), ao seu paso polo concello das Pontes, que foron licitadas por máis de 583.000 euros.
Esta intervención terán un prazo de execución de 6 meses e o obxectivo da Consellería de Infraestruturas e Mobilidade é comezala este verán.
As actuacións, que se desenvolverán no treito comprendido entre os puntos quilométricos 35+300 e 36+700 da autovía, consistirán na substitución da cuneta actual por outra nova co fin de mellorar o entorno, a situación ambiental e a seguridade viaria.
Este proxecto tamén resolverá os problemas actuais coas augas de escorrentía procedentes dos noiros e da mediana.
Ademais renovaranse as marcas viarias e repoñerase a sinalización vertical nos treitos nos que se vexan afectadas polas actuacións.