A Xunta publica no DOG a transferencia a prol do Concello de Salceda de Caselas dun treito da estrada provincial que comunica o municipio
Trátase do treito inicial de 350 metros da EP-2505 ao seu paso polo núcleo urbano
O departamento de Infraestruturas da Xunta ten entre as súas funcións a tramitación dos cambios de titularidade das estradas incluídas nas redes dependentes da comunidade autónoma e das entidades provinciais e locais
O Diario Oficial de Galicia publica hoxe o decreto de aprobación do cambio de titularidade a prol do Concello de Salceda de Caselas dun treito da estrada provincial EP-2505 ao seu paso polo núcleo urbano do municipio
No seguinte enlace ao DOG pode consultarse a información: https://cutt.ly/bylduf1
O Concello solicitou á Deputación Provincial de Pontevedra o cambio de titularidade do treito inicial da estrada que une Salceda de Caldelas, entre os puntos quilométricos 0+000 e 350. Esta petición dá cumprimento ao previsto nun convenio asinado entre as dúas administracións.
A Administración provincial acordou aprobar o cambio de titularidade proposto, polo que emitiu informe favorable para a transferencia dos 350 metros iniciais da vía provincial e solicitou o cambio de titularidade desta estrada á Consellería de Infraestruturas e Mobilidade.
A transferencia a prol do Concello de Salceda de Caselas tramítase de acordo co previsto na Lei 8/2013, do 28 de xuño, de estradas de Galicia, que estable a súa aprobación por decreto da Xunta, a proposta da Consellería de Infraestruturas e Mobilidade como competente en materia de estradas e logo do acordo entre as administracións implicadas.
Co cambio de titularidade aprobado na reunión do Consello da Xunta do pasado día 17 de abril, o Concello pontevedrés terá a competencia para actuar nesta vía e asume a responsabilidade da súa conservación e mantemento.
O decreto publicado hoxe polo departamento de Infraestruturas da Xunta producirá efectos desde mañá.
A entrega dos bens formalizarase no prazo dos dous meses seguintes á súa publicación no DOG mediante a sinatura da correspondente acta de entrega entre o Concello de Salceda de Caselas e a Deputación Provincial.