A conselleira Infraestruturas e Mobilidade, Ethel Vázquez, mantivo esta tarde unha videoconferencia coas federacións de transporte de viaxeiros por estrada de Galicia, para abordar a reactivación da actividade no sector
A Xunta informa ao sector do transporte público da solicitude ao Goberno de España dunha compensación de 8 millóns de euros polas consecuencias das restricións da mobilidade
Ethel Vázquez explica que esta compensación é necesaria para frear o impacto negativo derivado do estado de alarma e da caída de usuarios nun 97% no transporte público interurbano
Lembra que o Goberno galego tamén lle demandou onte ao Ministerio de Transportes un protocolo único de limpeza e hixiene para vehículos e traballadores
Salienta que a Xunta achegará 1 millón de euros de anticipos polos servizos de transporte interurbano prestados coas concesións actuais, para paliar as consecuencias das restricións polo estado de alarma
Indica que o Executivo autonómico, para facilitar a actividade do sector, emitirá unha certificación dixital mentres non se poida expedir fisicamente o CAP
A Xunta informa ao sector do transporte público da solicitude ao Goberno de España dunha compensación de 8 millóns de euros polas consecuencias das restricións da mobilidade.
A conselleira Infraestruturas e Mobilidade, Ethel Vázquez, xunto co secretario xeral, Joaquín Macho, e o director xeral de Mobilidade, Ignacio Maestro, mantivo esta tarde unha videoconferencia coas federacións de transporte de viaxeiros por estrada de Galicia -Transgacar, Fegatravi, Fegabús e Anetra- para abordar a reactivación da actividade no sector.
Vázquez Mourelle explicou que esta compensación solicitada ao Ministerio de Transportes é necesaria para frear o impacto negativo derivado do estado de alarma e da caída de usuarios nos servizos de transporte público interurbano.
Precisou que se trata dunha caída de pasaxeiros do 97%, o que xera unhas necesidades adicionais de financiamento para as concesións actuais, afectadas polo estado de alarma.
Tamén fixo fincapé en que é preciso garantir un transporte seguro, polo que onte se lle reiterou ao Executivo central a necesidade dun protocolo único de limpeza e hixiene para vehículos e traballadores.
Resaltou que a Xunta segue a traballar para blindar a sostibilidade do transporte público. Neste sentido, o Goberno galego vai pagar 1 millón de euros de anticipos polos servizos de transporte interurbano que se están prestando coas concesións actuais, minimizando as consecuencias das restricións impostas á mobilidade polo estado de alarma.
Ademais adiantou que para facilitar a actividade do sector, a Xunta vai emitir unha certificación dixital mentres non se poida expedir fisicamente o CAP, o certificado de aptitude profesional que acredita aos condutores -de viaxeiros e de mercadorías-, no exercicio da súa actividade.
O Executivo autonómico continúa a sumar esforzos a prol do transporte público, pois nun territorio tan disperso como o galego é fundamental para o funcionamento da sociedade e para que os cidadáns accedan aos servizos públicos.
Imaxes relacionadas
