A conselleira de Infraestruturas e Mobilidade, Ethel Vázquez, mantivo unha reunión por videoconferencia co equipo responsable deste proxecto para supervisar o seu avance e as medidas de prevención da saúde adoptadas por mor do COVID-19
A Xunta constata que as obras da conexión do polígono de San Cibrao das Viñas coa A-52 avanzan coas medidas de protección axeitadas e ao ritmo necesario para o seu remate no verán
Os operarios dispoñen de material de protección, manteñen a distancia de seguridade esixida e extreman as medidas de hixiene
As obras atópanse ao 90 % da súa execución total, ao estar o movemento de terras practicamente rematado, ao igual que as estruturas
O viaduto do rego de San Benito está practicamente finalizado e prevese realizar en maio a proba de carga
A nova vía, cun investimento autonómico de máis de 21 millóns de euros, reducirá en máis do 60% o percorrido actual entre o polígono e a A-52
Ethel Vázquez apunta que a situación actual evidencia aínda máis a importancia da capacidade loxística para prestar servizos axeitados á poboación
A conselleira de Infraestruturas e Mobilidade, Ethel Vázquez, salientou hoxe que as obras da conexión do polígono de San Cibrao das Viñas coa A-52 avanzan coas medidas de protección axeitadas e ao ritmo necesario para o seu remate no verán.
Vázquez Mourelle, xunto coa delegada territorial da Xunta en Ourense, Marisol Díaz Mouteira, mantivo unha videoconferencia co equipo responsable do proxecto para supervisar o seu avance e as medidas de prevención da saúde adoptadas por mor do COVID-19.
Nesta reunión, na que participaron o alcalde de San Cibrao das Viñas, Manuel Pedro Fernández, e representantes da Asociación de Empresarios, abordouse o reinicio este luns das obras, logo de dúas semanas paralizadas polo estado de alarma reforzado decretado polo Goberno.
A responsable de Infraestruturas subliñou que se teñen adoptado as medidas de seguridade necesarias para o desenvolvemento dos traballos de acordo aos protocolos e recomendacións sanitarias.
Concretou que os operarios dispoñen de material de protección, están a traballar mantendo a distancia de seguridade esixida, extremando as medidas de hixiene e con protocolos para as zonas comúns.
No que se refire ao progreso dos traballos, destacou que xa se atopan ao 90% da súa execución total, pois actualmente o movemento de terras está practicamente rematado ao igual que as estruturas.
Sinalou que o viaduto do rego de San Benito está finalizado, pendente só de pequenos remates, e avanzou que a previsión é poder realizar a proba de carga en maio.
Apuntou que tamén se ten iniciado o estendido de firme nalgúns puntos e onte mesmo se retomaron estes traballos no ramal de entrada desde Ourense e parte da futura glorieta.
A conselleira puxo en valor este novo viario, cun investimento da Xunta superior aos 21 millóns de euros, que reducirá en máis do 60% o percorrido actual entre o polígono e a autovía que vai a Madrid.
Salientou que esta actuación é estratéxica e suporá o incremento da seguridade viaria, a mellora da conectividade coa autovía de Celanova e o reforzo da competitividade de toda esa zona. A ese respecto, apuntou que a situación actual evidencia aínda máis a importancia da capacidade loxística para prestar servizos axeitados á poboación.
Imaxes relacionadas
