O 061 de Galicia asistiu a nove persoas por oito accidentes de circulación durante a Semana Santa
Desde as 15,00 horas do mércores, 8 de abril, ata as 23,59 horas do domingo, 12 de abril, a Central de Coordinación de Urxencias Sanitarias de Galicia-061 recibiu once chamadas por accidentes de tráfico
Urxencias Sanitarias de Galicia-061 asistiu durante a Semana Santa a nove persoas debido a oito accidentes de tráfico ocorridos nas estradas galegas. O período contabilizado comprende desde as 15,00 horas do mércores, 8 de abril, ata as 23,59 horas do domingo, 12 de abril. O día que rexistrou máis incidentes foi o sábado con catro sinistros de tráfico.
A Central de Coordinación do 061, que xestiona e coordina os servizos prehospitalarios en casos de urxencia e emerxencia en Galicia, recibiu nestes días 11 chamadas en relación cos accidentes de tráfico. Estas alertas xeraron oito asistencias sanitarias por parte do persoal do 061 que atendeu un total de nove persoas. A proporción de homes e mulleres atendidos foi do 55,5% e do 44,5% respectivamente. Nas idades dos feridos, obsérvase que o 55,5% dos atendidos tiña entre 20 e 29 anos.
Por provincias, Pontevedra foi a a que rexistrou máis sinistros con cinco accidentes de tráfico durante os desprazamentos destas datas.
Provincia | Accidentes |
A Coruña | 2 |
Lugo | 1 |
Ourense | 0 |
Pontevedra | 5 |
Galicia | 8 |
Os recursos sanitarios mobilizados polos médicos que atenderon as chamadas na Central de Coordinación do 061 foron oito. Así, as ambulancias asistenciais de soporte vital básico mobilizáronse en sete sinistros. As ambulancias convencionais asistiron nunha ocasión.
En seis casos os feridos foron trasladados aos centros sanitarios correspondentes e en tres ocasións atendeuse no propio lugar do incidente.