A Xunta mantén o peche dos mercados locais para a venda de produtos agroalimentarios por indicacións do Goberno central
En resposta á consulta remitida polo executivo galego, a Delegación do Goberno en Galicia explica que a venda de alimentación queda restrinxida aos establecementos comerciais
O executivo central rexeita así a posibilidade de que se reabran os mercados tradicionais ao aire libre, destacando ademais que supoñen unha congregación dun alto número de persoas, co conseguinte risco de contaxio masivo
A Xunta mantén o peche dos mercados locais para a venda de produtos agroalimentarios tras as indicacións recibidas por parte do Goberno central. En resposta á consulta remitida polo executivo galego, a Delegación do Goberno na comunidade explica que a venda de alimentación queda restrinxida aos establecementos comerciais, sempre que se tomen as debidas precaucións para evitar o contaxio do coronavirus.
Na súa exposición, a Delegación do Goberno cita o artigo 10 do Real Decreto polo que se declarou o estado de alarma, que establece medidas de contención no ámbito da actividade comercial, entre outras. Nese artigo -engade- cítase expresamente a suspensión da apertura ao público dos locais e establecementos minoristas, agás os relacionados coa alimentación, as bebidas e os produtos e bens de primeira necesidade.
Así, o executivo central prosegue que a actividade comercial minorista de alimentación queda restrinxida a establecementos comerciais, sempre que non supoñan un risco de contaxio polas condicións nas que se estean desenvolvendo. Deste xeito, apunta que non estaría permitida a celebración dos mercados tradicionais ao aire libre que -destaca a Delegación do Goberno- implican ademais unha congregación dun alto número de persoas, co conseguinte risco de contaxio masivo.
A Xunta emitiu onte unha consulta ao Ministerio de Agricultura, Pesca e Alimentación, ao de Sanidade e á Delegación do Goberno en Galicia para saber como se debía proceder tras o 31 de marzo, data na que finalizaba a prohibición da celebración dos devanditos mercados tradicionais, establecida por unha orde da Consellería do Medio Rural o pasado 24 de marzo.
Ao manterse o peche destes mercados locais, a venda de produtos agrícolas e gandeiros deberá seguirse realizando por medios alternativos que non impliquen presenza física, como por vía telefónica, con realización de pedidos a través da rede online (correo electrónico) ou similares, servidos polo produtor no domicilio do consumidor e evitando o desprazamento de persoas pola vía pública.
Imaxes relacionadas
