Extinguido o incendio forestal do concello ourensán de Vilamartín de Valdeorras, parroquia de San Vicente de Leira
Segundo as últimas estimacións, afectou unha superficie provisional de 24 hectáreas de monte raso
A Consellería do Medio Rural informa que quedou extinguido o lume do concello ourensán de Vilamartín de Valdeorras, parroquia de San Vicente de Leira.
O incendio comezou ás 14,15 h. deste sábado e deuse por extinguido ás 8,24 h da mañá deste domingo. Segundo as últimas estimacións, afectou unha superficie provisional de 24 hectáreas, todas de monte raso. No seu control traballaron 4 axentes, 8 brigadas, 4 motobombas e 6 helicópteros.
A Consellería do Medio Rural lembra que está a disposición da cidadanía o número de teléfono gratuíto 085, ao que deben chamar en caso de detectar algún lume forestal. Ademais, existe un teléfono anónimo e gratuíto para denunciar calquera actividade delituosa incendiaria da que se teña sospeita ou coñecemento: 900 815 085. Así mesmo, toda a información actualizada sobre incendios forestais poderá ser consultada na conta aberta de twitter: @incendios085.