A Xunta reivindica en Cuntis a formación de calidade para mellorar a ocupabilidade e a inserción laboral

O director xeral de Orientación e Promoción Laboral, Pablo Casal, mantivo un encontro esta mañá en Cuntis cos participantes do Programa Integrado de Emprego da localidade pontevedresa. Casal apelou á necesidade dunha formación de calidade que adapte as cualificacións aos perfís profesionais para incentivar a competitividade e a xeración de emprego, mellorando así a ocupabilidade e a inserción laboral dos desempregados.

O programa conta coa participación de 100 alumnos, procedentes dos concellos de Cuntis, Caldas de Reis, Portas, Barro e Moraña, entre os que se inclúen menores de 30 anos desempregados con baixa cualificación, menores de 40 anos desempregados cualificados, e desempregados maiores de 45 anos. Os participantes poderán acceder a un certificado de profesionalidade en actividades auxiliares de almacén, técnicas e procedementos de limpeza en superficies e mobiliario e locais, e tamén en actividades auxiliares na conservación e mellora de montes. Paralelamente, o programa tamén oferta formación transversal en capacidades profesionais no manexo de Internet e informática, sesións de coaching, orientación laboral e itinerarios personalizados para cada usuario, e medidas de conciliación adaptadas ao programa. A iniciativa conta cun obxectivo de inserción do 40%.

O director xeral de Orientación e Promoción Laboral salientou a importancia da cooperación entre Xunta, concellos e entidades para acadar o máximo proveito dos programas de integración de emprego. Casal remarcou a necesidade de impulsar un modelo de formación para o emprego dual e flexible, que inclúa a participación das empresas e dos concellos, e que dote aos seus participantes das técnicas e ferramentas necesarias para facilitar o seu acceso ao mercado laboral.