Un total de 24 empresas presentan as súas ofertas para executar a senda peonil entre o albergue de peregrinos e o centro de Ordes, cun investimento de preto de 650.000 euros

Un total de 24 empresas veñen de presentar as súas ofertas para executar unha senda peonil entre o albergue de peregrinos de Poulo e o centro de Ordes, cun investimento autonómico de preto de 650.000 euros.

Trátase da execución dunha senda pola marxe dereita na estrada AC-524, ao seu paso polo concello de Ordes, que partindo do itinerario peonil xa existente, finaliza no punto quilométrico 0+500, discorre polo núcleo de Ordes ata o 2+000, no lugar denominado A Costa.

Esta actuación ten como finalidade mellorar a seguridade viaria na zona, separando o tráfico peonil do tráfico rodado, e fomentar a mobilidade peonil en detrimento do uso dos vehículos.

A senda terá unha lonxitude total de case 1,3 km, a zona de tránsito peonil constará dunha sección tipo de formigón coloreado de 2 metros separada da calzada cunha banda axardinada de 0,90 metros, salvo nalgún tramo no que non sexa posible por falta de espazo. Tamén se prevé a execución dunha pasarela de 15 m sobre o río Cabrón.

Este novo treito conectará coa posada de peregrinos e permitirá unir, ademais, outros focos de atracción tales como os centros educativos IES nº1 de Ordes e o colexio Alfonso Rodríguez Castelao, cos pavillóns polideportivos, locais comerciais e industriais, farmacias, etc.

Deste xeito, a Consellería de Infraestruturas e Mobilidade dá continuidade e conectividade entre a senda existente e o novo itinerario.

Esta actuación enmárcase no plan de investimentos da Xunta en apoio ao Xacobeo 2021.