Lete Lasa destaca “o traballo, a constancia e o compañeirismo” dos nosos remeiros e remeiras que axudarán á Selección Galega no Campionato de España de Castrelo de Miño

O secretario xeral para o Deporte, José Ramón Lete Lasa, participou na xornada de hoxe na presentación do Campionato de España de Longa Distancia e de Seleccións Autonómicas de Remo que se celebrará entre o 8 e o 9 de febreiro no Parque Náutico de Castrelo de Miño, “unha das xoias das nosas infraestruturas deportes acuáticos que ademais é un vértice do gran polígono que forma xunto a Laias e Arnoia para configurar o CERLAC, onde ano tras ano recibimos aos mellores padexeiros do mundo”. Estes dous campionatos contarán coa participación de preto dun milleiro de deportistas sendo 572 os inscritos no de seleccións autonómicas e 435 no de Longa Distancia cun 46% de mulleres no primeiro caso e un 36% no segundo. Na presentación do evento tamén participou o presidente da Deputación Provincial de Ourense, José Manuel Baltar.

O responsable da carteira deportiva destacou o remo como un deporte que fomenta “os valores do traballo, do sacrificio, da constancia e sobre todo do compañeirismo e da lealdade”. Principios dixo, que posibilitan que os integrantes dunha embarcación sexan “capaces de remar como una sola persoa para alcanzar grandes logros”.

O mandatario galego mirou con orgullo e optimismo cara este campionatos que terán lugar esta fin de semana en Castrelo, especialmente o de seleccións autonómicas que se librará nas categorías cadete, xuvenil e absoluta. “Os remeiros e as remeiras da selección galega volverán a remar como unha sola persoa para conquistar novos triunfos para o remo galego, neste caso o trofeo de campións”, enfatizou.

Fitos do remo galego

Lete Lasa fixo un repaso á actualidade do remo galego e subliñou algúns dos fitos conseguidos xunto á Federación Galega e a Liga Galega de Traíñas como a cuarta posición de Galicia en canto ao número de licenzas por comunidade, que creceu un 9% no último ano (2.642) e a primeira en canto a número de clubs. Asemade destacou a clasificación para Toquio 2020 xa confirmada de Rodrigo Conde, un dos remeiros galegos de maior nivel.

O secretario xeral aseverou que “todos estes obxectivos son acadados grazas ao traballo de todas as administracións”, ao tempo que lembraba que a Xunta vén de incrementar nun 6% no orzamento do convenio que asina coa federación para o desenvolvemento da súa actividade deportiva acadando os 110.000 euros en 2020. Así tamén, o acordo coa Liga Galega de Traíñas para homes e mulleres sumará 110.000 euros, a mesma cantidade que en 2019 e que supón un incremento do 22% respecto do rexistrado en 2018 cando se destinaron 90.000 euros.