A Xunta destinou 47.700 euros á construción dunha pista de pádel cuberta de uso público e gratuíto en Guntín
O delegado territorial, José Manuel Balseiro, visitou as instalacións para comprobar o resultado das obras, promovidas polo Concello
A Consellería do Medio Rural apoiou a iniciativa coa achega do 70% do orzamento a través do GDR da comarca de Lugo
A Consellería do Medio Rural, a través da Axencia Galega de Desenvolvemento Rural (Agader), destinou preto de 47.700 euros á construción dunha pista de pádel cuberta promovida polo Concello de Guntín. A achega concedida, que foi xestionada polo do GDR da comarca de Lugo, supón o 70% do orzamento total (uns 68.000 euros).
O delegado territorial da Xunta, José Manuel Balseiro, visitou as instalacións para comprobar o resultado das obras acompañado da alcaldesa, María José Gómez Rodríguez, e do presidente do GDR, José Ángel Santos, entre outras persoas.
Esta iniciativa permitirá poñer á disposición da cidadanía tanto de Guntín como dos concellos limítrofes unhas instalacións cunha superficie de 200 metros cadrados para a práctica do pádel, cuxo uso será de acceso libre e gratuíto.
O mantemento das instalacións será a cargo do Concello e prevese que as persoas usuarias poidan empregar os aseos e vestiarios existentes no pavillón municipal de Guntín, situado na mesma parcela.
Balseiro apuntou que este é un dos proxectos non produtivos impulsados ao amparo da medida Leader, que buscan “sumar servizos nos concellos da nosa provincia para contribuír a que sexa cómodo e atractivo asentarse no medio rural”.
Imaxes relacionadas
