De conformidade co previsto no artigo 9.3 da Lei 16/2010, do 17 de decembro, de organización e funcionamento da Administración xeral e do sector público autonómico de Galicia (DOG nº 251, do 31 de decembro), dáse publicidade á encomenda de xestión da Dirección Xeral de Mobilidade á Axencia Galega de Infraestruturas para a execución das obras do proxecto de conexión do porto seco de Monforte de Lemos coas estradas LU-933 e N-120, coas características que a seguir se relacionan:
– Actividade. A Axencia Galega de Infraestruturas asistirá o órgano de contratación na licitación pública para a contratación da dita obra e realizará o seguimento e dirección técnica dela, sen prexuízo dos controis e verificacións que a Dirección Xeral de Mobilidade considere durante todo o proceso co fin de determinar os gastos.
– Natureza e alcance da xestión encomendada. Esta encomenda ten natureza intrasubxectiva ao ser a Dirección Xeral de Mobilidade e a Axencia Galega de Infraestruturas dous órganos dependentes da mesma consellería
– Prazo de vixencia. O período de vixencia desta encomenda comezará o 24 de maio de 2013 e rematará coa recepción das obras, máis un prazo adicional de tres meses para a emisión da certificación final.
– Modalidade de financiamento. Esta encomenda finánciase nun 80 % co Fondo Europeo de Desenvolvemento Rexional e encádrase no eixe 4 (transportes e enerxía, na medida 4.26).
Santiago de Compostela, 18 de xuño de 2013
José Antonio Fernández Vázquez
Secretario xeral técnico da Consellería de Medio Ambiente,
Territorio e Infraestruturas