No Diario Oficial de Galicia nº 10, do 17 de xaneiro de 2011, publicáronse a Orde do 30 de decembro de 2010 pola que se establecen as bases que regulan as axudas e subvencións para o fomento do emprego a través dos programas de cooperación no ámbito de colaboración coas entidades locais, e se procede á convocatoria para o ano 2011 (procedemento TR351A), e a Orde do 30 de decembro de 2010 pola que se establecen as bases que regulan as axudas e subvencións para o fomento do emprego a través dos programas de cooperación no ámbito de colaboración, cos órganos e organismos das administracións públicas distintas da local, universidades e entidades sen ánimo de lucro, e se procede á convocatoria para o ano 2011 (procedementos TR352A e TR352B, respectivamente).
No articulado de ambas as dúas ordes establécese a obriga de dispor de conta bancaria específica que se destinará exclusivamente para a xestión das axudas reguladas nas ordes, así como dispoñer dun código de conta de cotización específico, único e exclusivo para todos os traballadores contratados con cargo ás ditas ordes.
Ante diversas dificultades de carácter técnico que poderían obstaculizar o cumprimento destes requirimentos, postas de manifesto polos potenciais beneficiarios destas axudas e que poderían afectar a resolución dos respectivos procedementos é polo que, para establecer a seguridade xurídica de todas as entidades solicitantes e co fin de facilitar e axilizar a tramitación dos correspondentes procedementos administrativos, procede modificar as citadas ordes no sentido de eliminar as obrigas de dispor dunha conta bancaria e dun código de conta de cotización específicos, entendendo que é máis que suficiente, para os efectos de manter o control sobre as axudas concedidas, co mantemento da obriga de identificación en conta contable separada de todos os ingresos e gastos referidos a operacións da afectación da subvención á finalidade da súa concesión.
Con base en todo o anterior, e no uso das facultades que me foron concedidas,
DISPOÑO:
Artigo 1º.-Orde do 30 de decembro de 2010 pola que se establecen as bases que regulan as axudas e subvencións para o fomento do emprego a través dos programas de cooperación no ámbito de colaboración coas entidades locais, e se procede á convocatoria para o ano 2011.
1. Modifícase a letra b) do número 1 do artigo 7º.- Xustificación e pagamento, que queda redactado como segue:
«b) Orixinais ou copias compulsadas ou cotexadas dos partes de alta na Seguridade Social».
2. Modifícase a letra f) do número 1 do artigo 9º.- Obrigas dos/as beneficiarios/as. Revogación, que queda redactado como segue:
«f) Á identificación en conta contable separada de todos os ingresos e gastos referidos a operacións da afectación da subvención á finalidade da súa concesión».
O anterior enténdese sen prexuízo da obriga de xustificación das subvencións percibidas nos termos establecidos na Lei 38/2003, do 17 de novembro, xeral de subvencións, e nesta norma.
3. Elimínase a letra g) do número 1 do artigo 9º.- Obrigas dos/as beneficiarios/as. Revogación.
4. Modifícase o número 3 do artigo 14º.- Contratación dos traballadores e traballadoras, que queda redactado como segue:
«As entidades darán de alta na Seguridade Social as persoas contratadas no código de conta de cotización que corresponda».
Artigo 2º.-Orde do 30 de decembro de 2010 pola que se establecen as bases que regulan as axudas e subvencións para o fomento do emprego a través dos programas de cooperación no ámbito de colaboración, cos órganos e organismos das administracións públicas distintas da local, universidades e entidades sen ánimo de lucro, e se procede á convocatoria para o ano 2011.
1. Modifícase a letra g) do número 1 do artigo 8º.- Obrigas das entidades beneficiarias. Revogación, que queda redactado como segue:
«g) Á identificación en conta contable separada de todos os ingresos e gastos referidos a operacións da afectación da subvención á finalidade da súa concesión».
O anterior enténdese sen prexuízo da obriga de xustificación das subvencións percibidas nos termos establecidos na Lei 38/2003, do 17 de novembro, xeral de subvencións, e nesta norma.
2. Elimínase a letra h) do número 1 do artigo 8º.- Obrigas das entidades beneficiarias. Revogación.
3. Modifícase o número 3 do artigo 15º.-Contratación dos traballadores e traballadoras, que queda redactado como segue:
«As entidades darán de alta na Seguridade Social as persoas contratadas no código de conta de cotización que correponda».
4. Modifícase o número 3 do artigo 20º.- Contratación, que queda redactado como segue:
«As entidades darán de alta na Seguridade Social os axentes de emprego e unidades de apoio contratados no código de conta de cotización que corresponda».
Artigo 3º.-Esta modificación non afecta o prazo establecido nas referidas ordes para a presentación de solicitudes.
Disposición derradeira
Única.-Esta disposición entrará en vigor o día seguinte ao da súa publicación.
Santiago de Compostela, 8 de marzo de 2011.
Beatriz Mato Otero
Conselleira de Traballo e Benestar
