Con data do 14 de outubro de 1977, o Concello de Lugo cedeu a título gratuíto á Administración do Estado, mediante escritura pública, unha parcela de terreo para a construción dun centro de formación profesional ocupacional.
Unha vez comprobado que a Administración do Estado nunca aceptou a cesión, e de conformidade coa Lei 12/1983, do 14 de outubro, do proceso autonómico, e co Real decreto 146/1993, do 29 de xaneiro, de traspaso de funcións e servizos da xestión da formación profesional ocupacional á Comunidade Autónoma de Galicia, a Secretaría Xeral e do Patrimonio tramitou o correspondente expediente de aceptación de cesión, de conformidade co disposto nos artigos 16º, 17º e 23º da Lei 3/1985, do 12 de abril, do patrimonio da Comunidade Autónoma de Galicia, e 33º, 34º e 38º do Decreto 50/1989, do 9 de marzo, polo que se aproba o Regulamento para a execución da dita lei.
Na súa virtude, por proposta da conselleira de Facenda, e logo da deliberación do Consello da Xunta de Galicia na súa reunión do día vinte de xaneiro de dous mil once,
DISPOÑO:
Artigo 1º
Acéptase nos termos establecidos polo Concello de Lugo a cesión, a título gratuíto, do inmoble seguinte:
Urbano. Predio destinado a soar, denominado Carballeira das Mercedes, na rúa Montirón, s/n, desta cidade. Ten a superficie de sete mil setecentos cincuenta e oito metros cadrados. Estrema: norte, con Virtudes Carreira e rúa de Montirón; sur, camiño coñecido por de Lamas, Ángel Miragaya e Concello de Lugo; leste, camiño de Lamas; oeste, parcela do concello e deputación, onde está a Escola Técnica de Artes Aplicadas.
Inscrito no Rexistro da Propiedade nº 1 de Lugo, no tomo 836, libro 418, folio 136, predio nº 33.498. Inscrición 1ª.
Referencia catastral: 8918402PH1681N0001RU.
Artigo 2º
A Consellería de Facenda, a través da Secretaría Xeral e do Patrimonio, procederá á formalización da aceptación da cesión no correspondente documento público.
Disposición derradeira
A Consellería de Facenda, a través da Secretaría Xeral e do Patrimonio, levará a cabo todos os trámites necesarios para a efectividade deste decreto.
Santiago de Compostela, vinte de xaneiro de dous mil once.
Alberto Núñez Feijóo
Presidente
Marta Fernández Currás
Conselleira de Facenda