Con data do 29 de decembro de 2010 o Ministerio de Ciencia e Innovación (antes Ministerio de Educación e Ciencia) e a Consellería de Economía e Industria (antes Consellería de Innovación e Industria) asinaron, logo da tramitación regulamentaria, unha addenda ao convenio específico de colaboración para financiar a construción das instalacións do Centro de Excelencia en Electrónica para Vehículos Intelixentes. De acordo co establecido nas cláusulas da addenda, que figura como anexo a esta resolución, procede a súa publicación no Diario Oficial de Galicia.
Santiago de Compostela, 25 de xaneiro de 2011.
Javier Guerra Fernández
Conselleiro de Economía e Industria
ANEXO
Addenda ao convenio específico de colaboración entre o Ministerio de Educación y Ciencia e a Consellería de Innovación e Industria da Xunta de Galicia para financiar a construción das instalacións do Centro de Excelencia en Electrónica para Vehículos Intelixentes
Madrid, 29 de decembro de 2010.
Reunidos:
Dunha parte, Cristina Garmendia Mendizábal, ministra de Ciencia e Innovación, nomeada por Real decreto 436/2008, do 14 de abril, actuando en virtude do artigo 13º.3 da Lei 6/1997, do 14 de abril, de organización e funcionamento da Administración xeral del Estado e a disposición adicional décimo terceira da Lei 30/1992, de réxime xurídico das administracións públicas e do procedemento administrativo común.
Doutra parte, Javier Guerra Fernández, conselleiro de Economía e Industria, nomeado para o devandito cargo por Decreto 81/2009, do 19 de abril, en virtude das facultades que lle confire o artigo 34º da Lei 1/1983, do 22 de febreiro, de normas reguladoras da Xunta de Galicia e da súa Presidencia, modificada polas leis 11/1998, do 20 de outubro; 7/2002, do 27 de decembro; 2/2007, do 28 de marzo e 12/2007, do 27 de xullo e tamén polo acordo do Consello da Xunta do 27 de marzo de 1991, publicado por resolución de da Consellería de Economía e Facenda do 8 de abril de 1991 (DOG nº 82).
Recoñecéndose mutuamente plena capacidade para outorgar este acto, expoñen:
Que as partes que interveñen (antes denominadas Ministerio de Educación y Ciencia e Consellería de Innovación e Industria, respectivamente) subscribiron, con data do 21 de decembro de 2007, un convenio para financiar a construción do Centro de Excelencia en Electrónica para Vehículos Intelixentes.
Que existen causas obxectivas que fan preciso unha revisión dos prazos previstos na cláusula sétima, manténdose nos demais puntos a redacción establecida no convenio asinado en 2007. Así mesmo, tamén se modifica a distribución do orzamento que aparece na memoria que acompaña ao devandito convenio, aínda que se mantén a cifra total.
Que os feitos que motivaron a necesidade de ampliar o prazo de execución previsto para a construción da citada infraestrutura científica son os que se expoñen a continuación:
-Producíronse importantes atrasos no proceso de expropiación dos terreos nos que se asentarán as instalacións do novo centro. Con data 30-6-2008 nomeouse a CTAG como beneficiaria da expropiación dos terreos por parte da Consellería de Vivenda e Solo da Xunta de Galicia. Posteriormente, o 22-1-2009 asinouse o convenio de colaboración entre a Fundación CTAG e Xestur Pontevedra, S.A. para a xestión e adquisición dos terreos necesarios para a implantación do Centro de Excelencia en Electrónica para Vehículos Intelixentes. Finalmente, o 14-7-2009 tivo lugar a resolución do Instituto Galego de Vivenda e Solo pola que se acorda o inicio polo procedemento de taxación conxunta e se somete a información pública o expediente expropiatorio dos bens e dereitos que se precisan ocupar para a execución do proxecto sectorial do Centro de Excelencia en Electrónica para Vehículos Intelixentes. Actualmente os trámites de expropiación encóntranse xa finalizados.
Que os feitos que motivaron a necesidade de modificar a distribución do orzamento son os que se indican a continuación:
-Esta situación económica que afecta en boa medida ao sector da automoción e a dispoñibilidade orzamentaria da Xunta de Galicia fixeron necesario realizar unha reconsideración do plan de construción e posta en marcha do futuro Centro de Excelencia en Electrónica para Vehículos Intelixentes. Neste sentido formúlase abordar unha primeira fase que permita, cos 10.000.000 dispoñibles na actualidade, construír un edificio (deseñado para ser ampliable no futuro) e poñer en funcionamento os laboratorios e os equipamentos necesarios que permitan dende un inicio o desenvolvemento das liñas de competencia propostas e a consolidación das actividades en termos de creación de emprego e de evolución de cifra de negocio.
Non obstante, toda a infraestrutura formulada actualmente se concibe de tal maneira que permitirá o seu crecemento nunha fase posterior.
Polo exposto, as partes acordan:
Formalizar esta addenda ao convenio do 21 de decembro de 2007, co fin de modificar a cláusula sétima e a distribución do orzamento que se recolle na memoria que se incorpora como anexo I ao devandito convenio:
A cláusula sétima quedará redactada como a continuación se expresa:
«Sétima.-Vixencia e resolución.
1. Este convenio entrará en vigor á súa firma por ambas as dúas partes e a vixencia estenderase ata a realización das actividades para as que se concede o préstamo, actividades que se executarán no prazo máximo de cinco anos desde o seguinte ao da firma do convenio.
2. Poderá resolverse este convenio antes do prazo previsto por mutuo acordo das partes, por incumprimento ou denuncia dalgunha delas. Nos dous últimos supostos, a parte que desexe resolver o convenio deberá notificalo por escrito á outra con dous meses de antelación».
A nova distribución económica, que substitúe á que aparece na memoria incorporada como anexo I ao convenio asinado en 2007, reflíctese na seguinte táboa:
Ver referencia pdf "03200D004P010.PDF"
2. Na cláusula novena modifícase o punto 2, que queda redactado da seguinte forma:
«2. Este convenio, así como as addendas que se puidesen aprobar, serán publicadas no Boletín Oficial del Estado e no Diario Oficial de Galicia».
En proba de conformidade, as partes asinan a presente addenda por duplicado exemplar e para un só efecto no lugar e data arriba indicados.
Polo Ministerio de Ciencia e Innovación: Cristina Garmendia Mendizábal, ministra de Ciencia e Innovación.
Pola Xunta de Galicia: Javier Guerra Fernández, conselleiro de Economía e Industria.