Mediante a Orde do 13 de xaneiro de 2010 (DOG nº 13, do 20 de xaneiro de 2011) publicouse a convocatoria de axudas a investimentos a bordo de buques pesqueiros para o ano 2011, en aplicación das bases reguladoras para a súa concesión (Orde do 31 de maio de 2010; DOG nº 105, do 4 de xuño). Cómpre agora modificar a convocatoria introducindo unha disposición transitoria de feito que se poidan acoller a ela aqueles interesados aos cales non se lles puido atender a súa solicitude no ano 2010 ou aqueloutros que non puideron presentala por estar pechado o prazo de presentación de solicitudes.
Por todo o anterior e de acordo co disposto no artigo 30º.1.3 do Estatuto de autonomía de Galicia, en uso das competencias que me confire a Lei 1/1983, do 22 de febreiro, de normas reguladoras da Xunta e da súa Presidencia, e demais normativa de aplicación,
Dispoño:
Artigo único.
Modifícase a Orde do 13 de xaneiro de 2011 pola que se convocan para o ano 2011, en réxime de concorrencia competitiva, axudas a investimentos a bordo dos buques pesqueiros cofinanciadas co Fondo Europeo de Pesca, tramitada como anticipado de gasto, de xeito que, sen que isto dea lugar a un novo prazo de presentación de solicitudes, se introduce a disposición transitoria seguinte:
Disposición transitoria
Única.-Só para a convocatoria do ano 2011 terán validez as actas de non inicio realizadas con posterioridade ao 1 de xaneiro de 2010 cuxas solicitudes non se puidesen presentar por estar pechado o prazo ou existir a imposibilidade de que fosen atendidas no dito exercicio económico de 2010, salvo que o solicitante renunciase á axuda.
Disposición derradeira
Esta orde producirá efectos a partir do día seguinte ao da súa publicación no Diario Oficial de Galicia.
Santiago de Compostela, 3 de febreiro de 2011.
Rosa María Quintana Carballo
Conselleira do Mar