O Pleno do Concello de Paradela, en sesión plenaria do día 24 de novembro de 2010, acordou ceder, a título gratuíto, a favor da Comunidade Autónoma de Galicia, unha parcela para a construción dun centro residencial e de día para persoas maiores, dependente da Consellería de Traballo e Benestar que ten conferida a competencia en materia de maiores.
A Secretaría Xeral e do Patrimonio tramitou o correspondente expediente de aceptación de cesión, de conformidade co disposto nos artigos 16º, 17º e 23º da Lei 3/1985, do 12 de abril, do patrimonio da Comunidade Autónoma de Galicia, e 33º, 34º e 38º do Decreto 50/1989, do 9 de marzo, polo que se aproba o Regulamento para a execución da devandita lei.
Na súa virtude, por proposta da conselleira de Facenda e logo da deliberación do Consello da Xunta de Galicia, na súa reunión do día trece de xaneiro de dous mil once,
DISPOÑO:
Artigo 1º
Acéptase, nos termos establecidos polo Concello de Paradela a cesión, a título gratuíto, do inmoble seguinte:
Urbano, sito na rúa Cabaleiros de Santiago de Paradela, concello de Paradela, cunha superficie de tres mil oitocentos vinte e nove metros con oitenta e nove decímetros cadrados. Estrema: ao norte, estrada de Aldosende; ao sur, Celia González López e rúa asfaltada; ao leste, Celia González López e Aurora Arias López; e ao oeste, rúa asfaltada e Celia González López.
O inmoble atópase inscrito no Rexistro da Propiedade de Sarria no tomo 480, libro 36, folio 187, predio 4.225. Ten o número de referencia catastral urbana: 7359027PH1375N0001JP e rústica: 7359027PH1375N0000HO.
Artigo 2º
O destino do inmoble será a construción dun centro residencial e de día para maiores.
Artigo 3º
A Consellería de Facenda, a través da Secretaría Xeral e do Patrimonio, procederá á formalización da cesión no correspondente documento público.
Disposición derradeira
A Consellería de Facenda, a través da Secretaría Xeral e do Patrimonio, levará a cabo todos os trámites necesarios para a efectividade deste decreto.
Santiago de Compostela, trece de xaneiro de dous mil once.
Alberto Núñez Feijóo
Presidente
Marta Fernández Currás
Conselleira de Facenda