Dentro do Plan de actividades da Escola Galega de Administración Pública para o ano 2011 e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócanse, en colaboración coa Axencia de Protección da Legalidade Urbanística, as xornadas sobre a protección da legalidade urbanística, conforme as seguintes bases:

1. Obxectivos.

A Axencia de Protección da Legalidade Urbanística (APLU) é un ente público de natureza consorcial creado para o desenvolvemento en común, pola Administración autonómica e os municipios que voluntariamente se integren nesta, das funcións de inspección, restauración da legalidade e sanción en materia de urbanismo e o desempeño de cantas competencias lle asignen os seus estatutos (Decreto 213/2007, do 31 de outubro).

O obxectivo destas xornadas é mellorar o coñecemento da APLU (obxectivos, prioridades e actividades realizadas), así como dar a coñecer as novidades e modificacións introducidas pola Lei 2/2010, do 25 de marzo, de medidas urxentes de modificación da Lei 9/2002, do 30 de decembro, a súa incidencia no eido competencial dos concellos e da axencia, con especial referencia aos cambios producidos no solo rústico, no solo de núcleo rural e a súa incidencia na reposición da legalidade urbanística.

2. Contidos.

Serán tratados, entre outros, os seguintes temas:

-A Axencia de Protección da Legalidade Urbanística. Natureza xurídica. Funcións. Integración dos concellos. Concellos adheridos. Colaboración institucional e competencias delegadas. Plan de Inspección 2011.

-Mecanismos de control previo: inspección e vixilancia. Usos e actividades permitidas, autorizables e prohibidas. Principais novidades introducidas pola Lei 2/2010, do 25 de marzo.

-Protección da legalidade urbanística: reposición da legalidade urbanística en obras sen licenza ou autorización autonómica consonte o disposto pola Lei 2/2010, do 25 de marzo.

-Procedemento sancionador: infraccións e sancións, persoas responsables. Principais novidades introducidas pola Lei 2/2010, do 25 de marzo.

-Ilícitos penais: delitos sobre a ordenación do territorio. Deber de colaboración institucional.

3. Destinatarios.

Alcaldes e concelleiros, secretarios municipais, persoal funcionario ou laboral dos concellos que desenvolvan funcións relacionadas co urbanismo, inspectores e subinspectores da Xunta de Galicia e interesados en xeral.

4. Desenvolvemento.

Estas xornadas desenvolverase nas seguintes datas e lugares:

-8 de febreiro, en Santiago de Compostela, no Ssalón de actos da Escola Galega de Administración Pública (EGAP), rúa Madrid, 2-4.

-15 de febreiro, na Coruña, no edificio administrativo de Monelos, praza Luís Seoane, s/n.

-22 de febreiro, en Lugo, no salón de actos do edificio administrativo da Xunta de Galicia, rolda da Muralla, 70, planta baixa.

-1 de marzo, en Ourense, no salón de actos do edificio administrativo da Xunta de Galicia, avenida da Habana, 79.

-15 de marzo, en Pontevedra, no salón de actos do edificio administrativo da Xunta de Galicia, rúa Fernández Ladreda, 43.

-22 de marzo, en Vigo, no salón de actos do edificio administrativo da Xunta de Galicia, rúa Concepción Arenal, 8-2º andar.

-29 de marzo, en Ferrol, no edificio administrativo da Xunta de Galicia, praza Camilo José Cela, s/n.

Duración: 6 horas lectivas cada xornada, en horario de mañá e tarde.

5. Número de prazas.

Limitado pola capacidade dos locais.

6. Solicitudes.

-Tramitación de solicitudes: as solicitudes irán dirixidas ao director da Escola Galega de Administración Pública (polígono das Fontiñas, rúa de Madrid, 2-4, CP 15707, Santiago de Compostela), segundo o modelo que figura como anexo a esta convocatoria, e serán presentadas no rexistro xeral da EGAP, ou ben de calquera das formas previstas no artigo 38º.4 da Lei 30/1992, do 26 de novembro, de réxime xurídico das administracións públicas e do procedemento administrativo común. Serán admitidas inscricións por medio de fax enviado ao número 981 54 63 30 ou por correo electrónico dirixido ao enderezo novas.egap@xunta.es

-Inscricións fóra de prazo: só serán admitidas, de quedar prazas libres, coa condición de que cumpran os requisitos xerais antes indicados.

-As persoas solicitantes poderán obter a confirmación da súa admisión se chaman por teléfono, das 8.30 ás 14.30 horas, aos seguintes números: 981 54 62 41 e 881 99 70 14.

7. Prazo.

O prazo de presentación de solicitudes finalizará:

-O día 4 de febreiro, para a xornada de Santiago de Compostela.

-O día 11 de febreiro, para a xornada da Coruña.

-O día 18 de febreiro, para a xornada de Lugo.

-O día 25 de febreiro, para a xornada de Ourense.

-O día 11 de marzo, para a xornada de Pontevedra.

-O día 18 de marzo, para a xornada de Vigo.

-O día 25 de marzo, para a xornada de Ferrol.

8. Modificacións.

A EGAP resérvase a facultade de interpretar e de resolver as incidencias que poidan xurdir no desenvolvemento destas xornadas, así como a facultade de cancelala se o escaso número de solicitudes non xustificase a súa realización.

9. Certificado de asistencia.

Seralles entregado un certificado de asistencia, ao final de cada xornada, a aquelas persoas inscritas que participasen asiduamente, e sempre que a súa asistencia sexa igual ou superior ao 85% das horas lectivas programadas. Neste documento aparecerán de forma expresa o contido, a data e o lugar de realización de cada xornada.

Santiago de Compostela, 11 de xaneiro de 2011.

Pablo Figueroa Dorrego

Director da Escola Galega de Administración Pública

Ver referencia pdf "01000D008P064.PDF"