O Decreto 303/2009, do 21 de maio, polo que se establece a estrutura orgánica da Consellería de Presidencia, Administracións Públicas e Xustiza (DOG nº 101, do 26 de maio) establece a xestión das competencias que se lle atribúen á Comunidade Autónoma galega en diferentes materias relacionadas coas corporacións locais; e entre outras funcións o fomento e impulso da incorporación das novas tecnoloxías e de métodos de calidade nas administracións locais galegas.

Por outra banda a Lei 11/2007, do 22 de xuño, de acceso electrónico dos cidadáns aos servizos públicos, con carácter xeral, recoñece o dereito dos cidadáns a relacionarse coas administracións públicas por medios electrónicos e regula os aspectos básicos da utilización das tecnoloxías da información na actividade administrativa; nas relacións entre as administracións públicas, así como nas relacións dos cidadáns con estas, coa finalidade de garantir os seus dereitos, un tratamento común ante elas e a validez e eficacia da actividade administrativa en condicións de seguridade xurídica e establece como dereitos dos cidadáns o dereito a relacionarse coas administracións públicas utilizando medios electrónicos, así como que as administracións públicas deberán habilitar diferentes canles ou medios para a prestación dos servizos electrónicos, garantindo en todo caso o acceso a estes a todos os cidadáns, con independencia das súas circunstancias persoais, medios ou coñecementos, na forma que

consideren axeitada.

Así mesmo, o 28 de setembro de 2009 asinouse o Protocolo de colaboración entre a Xunta de Galicia, as deputacións provinciais da Coruña, Lugo, Ourense e Pontevedra e a Federación Galega de Municipios e Provincias (Fegamp) para o desenvolvemento da e-Administración en Galicia, co obxectivo da planificación conxunta e a coordinación dos investimentos e as actuacións que están a desenvolver para a implantación da Administración electrónica en Galicia.

Por outra banda, o Convenio de colaboración entre a Xunta de Galicia e a Federación Galega de Municipios e Provincias (Fegamp) para o desenvolvemento da Administración electrónica nas entidades locais da Comunidade Autónoma de Galicia, asinado o 13 de xullo de 2010, ten por obxecto o impulso e desenvolvemento da Administración electrónica nas entidades locais de Galicia, coa finalidade de lles garantir aos cidadáns o acceso electrónico aos servizos públicos mediante a implantación de procedementos, plataformas e redes de comunicación que posibiliten a súa interacción con calquera Administración pública.

Para acadar o obxectivo da implementación da e-Administración nas entidades locais de Galicia estase executando un proxecto que está dentro do Programa operativo Feder Galicia 2007-2013, con financiamento comunitario nun 80%, eixe prioritario de intervención 1 Desenvolvemento da economía do coñecemento (I+D+i, sociedade da información e TIC) no ámbito terceiro sociedade da información na categoría de gasto 13 e na denominación das actuacións: servizos e aplicacións para os cidadáns (servizos electrónicos en materia de saúde, Administración pública, formación, inclusión etc.) Implantación da e-Administración e de prestación de servizos e métodos de xestión de calidade por parte das administracións locais galegas.

Así, por proposta do director xeral de Administración local e co obxectivo de facilitar a planificación conxunta e a coordinación necesaria para acadar unha uniformidade nas actuacións que permitan a implantación dun catálogo de procedementos administrativos comúns para as entidades locais de Galicia é imprescindible a creación da Comisión galega de validación e adaptación telemática de procedementos da Administración local para a tramitación electrónica

RESOLVO:

Primeiro.-Acordar a creación da Comisión galega de validación e adaptación telemática de procedementos da Administración local para a tramitación electrónica.

Segundo.-A comisión estará formada por:

1. O presidente ou presidenta da comisión, que será a persoa titular da Dirección Xeral de Administración Local.

2. O vicepresidente ou vicepresidenta primeira da comisión, que será a persoa titular da Secretaría Xeral de Modernización e Innovación Tecnolóxica.

3. O vicepresidente ou vicepresidenta segunda da comisión, que será a persoa titular da Dirección Xeral de Avaliación e Reforma Administrativa.

3. Vogais:

a) En representación da Administración da Xunta de Galicia:

1. A persoa titular da Subdirección Xeral de Sistemas de Información e Modernización da Administración Pública ou funcionario con nivel mínimo de xefe de servizo do órgano correspondente.

2. A persoa titular da Subdirección Xeral de Xestión e Cooperación Económica coas EE.LL. ou funcionario con nivel mínimo de xefe de servizo do órgano correspondente.

3. A persoa titular da Subdirección Xeral de Modernización Administrativa ou funcionario do órgano correspondente.

4. A persoa titular do Servizo Técnico Xurídico da Secretaría Xeral da Consellería de Presidencia, Administracións Públicas e Xustiza.

b) En representación das deputacións provincias: un representante de cada unha das deputacións provinciais, designados por elas.

c) En representación da Federación Galega de Municipios e Provincias: catro representantes designados por ela.

Terceiro.-As funcións principais da comisión serán a validación do catalogo de procedementos así como calquera actuación relacionada co obxecto da propia comisión.

Cuarto.-A comisión poderá contar, a criterio da Presidencia ou desta, co asesoramento de técnicos, con voz e sen voto.

Quinto.-O secretario ou secretaria da comisión será un funcionario da Dirección Xeral de Administración Local.

Sexto.-Ordenar a publicación desta resolución no Diario Oficial de Galicia.

Santiago de Compostela, 29 de decembro de 2010.

Alfonso Rueda Valenzuela

Conselleiro de Presidencia, Administracións Públicas e Xustiza