A Xunta de Goberno local, en sesión ordinaria que tivo lugar o día 2 de novembro de 2010, adoptou, entre outros, o seguinte acordo:

a) Aprobar inicialmente a modificación puntual do Plan especial de protección e rehabilitación da cidade histórica (PE-1) no ámbito da unidade edificatoria 511174 (rúa do Pombal, número 28), segundo o proxecto presentado por Soledad Iglesias Cañete o 16 de xullo de 2009.

b) En aplicación do procedemento regulado polo artigo 86º.1 a) da Lei 9/2002, de ordenación urbanística e protección do medio rural de Galicia, o proxecto inicialmente aprobado someterase a información pública durante o prazo dun mes, con citación persoal dos propietarios afectados segundo o catastro, e anuncios que para o efecto se publicarán no Diario Oficial de Galicia e en dous xornais dos de maior circulación na provincia.

Durante o trámite de información pública solicitarase o informe do director xeral do Patrimonio Cultural, así como a declaración da Consellería de Medio Ambiente sobre innecesariedade de someter a modificación ao procedemento de avaliación ambiental estratéxica.

Así mesmo, durante o trámite de información pública, e como condición para a aprobación definitiva, deberán emendarse as seguintes cuestións:

1. Reformarse a redacción da epígrafe 1.3 da memoria (Determinacións do planeamento vixente), co obxecto de reflectir a supresión da unidade de intervención UI-8 que resulta da aprobación da revisión do Plan Xeral de Ordenación Municipal (PXOM).

2. Nos planos de ordenación resultante da modificación eliminarase a referencia e ordenación da antiga unidade de intervención UI-8, segundo as determinacións do vixente Plan Xeral de Ordenación Municipal (PXOM).

Durante o prazo dun mes, contado desde o día seguinte ao da publicación deste anuncio, os interesados poderán consultar o expediente no Servizo de Planeamento e Xestión e formular por escrito as alegacións que xulguen oportunas.

Santiago de Compostela, 17 de novembro de 2010.

Xosé A. Sánchez Bugallo

Alcalde