A Secretaría Xeral da Emigración é o órgano superior da comunidade autónoma ao que lle corresponde, entre outras, as competencias en materia de desenvolvemento da Lei 4/1983, do 15 de xuño, de recoñecemento da galeguidade, que desenvolve o artigo 7º do Estatuto de autonomía de Galicia, onde se establece o dereito das comunidades galegas de fóra de Galicia a colaborar e compartir a vida social e cultural do pobo galego.
A Xunta de Galicia, en materia de emigración, establece como unha das súas áreas de actuación prioritaria a asistencia socio-sanitaria a digna para todos os galegos e galegas residentes no exterior, mediante, entre outros, o programa de axudas asistenciais individuais, que teñen como obxectivo contribuír a paliar a carencia de medios económicos para poder afrontar as necesidades básicas de subsistencia na alimentación, asistencia sanitaria, cobertura nos casos de enfermidade ou outras situacións de carácter grave.
O Estatuto da cidadanía española no exterior, aprobado mediante a Lei 40/2006, do 14 de decembro, e que se configura como o marco xurídico que lles garante aos cidadáns residentes no exterior o exercicio dos seus dereitos e deberes constitucionais, establece no seu artigo 5º, a asistencia e protección por parte da Administración xeral do Estado e as comunidades autónomas, no marco das súas respectivas competencias, daqueles cidadáns residentes no exterior que se atopen en situación de necesidade.
A Xunta de Galicia, a través da Secretaría Xeral da Emigración, pretende, nunha actuación coordinada co Estado español, a consolidación dunha política de atención e protección aos galegos residentes no exterior que se atopen en situación de necesidade, coa finalidade de garantirlles a estes cidadáns o exercicio dos seus dereitos e deberes constitucionais e estatutarios en termos de igualdade cos españois residentes en Galicia.
A disposición adicional segunda do Decreto 325/2009, do 18 de xuño, de estrutura orgánica dos órganos superiores dependentes da Presidencia da Xunta de Galicia, desconcentra no secretario xeral da Emigración a competencia para a aprobación das bases, a convocatoria e a resolución das axudas e subvencións do seu respectivo ámbito de competencia.
En virtude do exposto e de conformidade co que se dispón na Lei 9/2007, do 13 de xuño, de subvencións de Galicia, o Decreto 11/2009, do 8 de xaneiro, polo que se aproba o regulamento da Lei 9/2007, na Lei 38/2003, do 17 de novembro, xeral de subvencións, naqueles preceptos que sexan básicos, e na Lei 30/1992, do 26 de novembro, de réxime xurídico das administracións públicas e do procedemento administrativo común e na normativa que a desenvolve, logo de informe da Asesoría Xurídica e da Intervención Delegada deste órgano,
RESOLVO:
Convocar o programa de axudas económicas individuais a galegos residentes no exterior, para o ano 2011.
Artigo 1º.-Obxecto.
O obxecto desta resolución é establecer a convocatoria de axudas económicas individuais de carácter social, nos termos e nas condicións que establecen as bases reguladoras que se recollen no anexo I, en réxime de concorrencia non competitiva, dirixidas aos emigrantes de orixe galega que posúan a nacionalidade española, e a determinados familiares, residentes no estranxeiro, que se atopen en situación de precariedade económica. Estas axudas están destinadas a cubrir as necesidades básicas de subsistencia e atención socio-sanitaria.
Artigo 2º.-Convocatoria e prazo das solicitudes.
1. Convócanse axudas económicas individuais a emigrantes galegos e a determinados familiares para o exercicio económico de 2011, de carácter individual, extraordinario e non periódico.
2. Prazo de presentación das solicitudes.
O prazo de presentación de solicitudes será de dous meses contados a partir do día seguinte ao da publicación desta resolución no Diario Oficial de Galicia. Se o día de remate do prazo de presentación de solicitudes non fose un día hábil, considerarase como último día do prazo o primeiro día hábil seguinte.
Artigo 3º.-Financiamento.
As axudas precisas para a realización deste programa concederanse con cargo á aplicación orzamentaria 04.50.312C.480.0.-Accións de política migratoria que figura no proxecto de Lei de orzamentos xerais da comunidade autónoma para o ano 2011. O crédito inicialmente outorgado para esta finalidade é de dous millóns trescentos vinte cinco mil euros (2.325.000 euros).
No proxecto de Lei de orzamentos xerais da comunidade autónoma para o ano 2011, na aplicación orzamentaria 04.50.312C.480.0, existe crédito suficiente para atender as axudas convocadas. O crédito asignado ao suposto do artigo 4º das bases reguladoras será de setecentos mil euros (700.000 euros). O crédito asignado aos supostos dos artigos 5º, 6º, 7º, 8º, 9º e 10º das bases, será de un millón seiscentos vinte e cinco mil euros (1.625.000 euros). De non cubrirse un dos créditos anteriores, poderá asignarse a contía sobrante ao outro crédito.
O total das axudas concedidas a un mesmo país destinado a financiar a correspondente convocatoria, non poderán superar o 63% do orzamento. Este límite podería aumentar no caso de que sobrase crédito orzamentario nos restantes países.
Esta convocatoria realizarase a través do procedemento de tramitación anticipada de gasto, ao abeiro do Decreto 11/2009, do 8 de xaneiro, polo que se aproba o regulamento da Lei 9/2007, de subvencións de Galicia, e da Orde do 11 de febreiro de 1998, modificada polas ordes do 27 de novembro de 2000 e do 25 de outubro de 2001. No proxecto de orzamentos para a Comunidade Autónoma de Galicia para 2011, aprobado polo Consello da Xunta de Galicia, existe crédito suficiente na aplicación orzamentaria para atender as axudas convocadas.
Os créditos iniciais poderán ser ampliados en función do previsto no artigo 30º.2 do Decreto 11/2009, do 8 de xaneiro, polo que se aproba o regulamento da Lei 9/2007, do 13 de xuño, de subvencións de Galicia. Este incremento do crédito quedará condicionado á declaración de dispoñibilidade de crédito como consecuencia da existencia de remanentes doutras convocatorias financiadas con cargo ao mesmo crédito ou mesmo programa, ou derivadas dunha xeración, ampliación ou incorporación de crédito ou no suposto previsto no artigo 25º.3 do citado decreto.
Artigo 4º.-Recursos.
Contra esta resolución cabe interpoñer potestativamente recurso de reposición ante o mesmo órgano que a ditou no prazo dun mes contado a partir do día seguinte ao da publicación no Diario Oficial de Galicia.
Así mesmo, poderá interporse recurso contencioso administrativo ante o Tribunal Superior de Xustiza de Galicia, no prazo de dous meses contados a partir do día seguinte ao da publicación, de acordo co establecido na Lei 29/1998, do 13 de xullo, da xurisdición contencioso-administrativo.
Aqueles que, de ser o caso, teñan interposto recurso de reposición, non poderán interpoñer recurso contencioso administrativo ata que sexa resolto expresamente ou se producise a desestimación presunta do recurso de reposición.
Santiago de Compostela, 13 de decembro de 2010.
J. Santiago Camba Bouzas
Secretario xeral da Emigración
ANEXO I
Bases reguladoras
Artigo 1º.-Obxecto.
O obxecto destas bases é regular a concesión de axudas económicas, individuais e de carácter social, dirixidas aos emigrantes de nacionalidade española e de orixe galega, e a determinados familiares, residentes no estranxeiro, que se atopen en situación de precariedade económica. Están destinadas a cubrir as necesidades básicas de subsistencia e atención socios-anitaria.
Artigo 2º.-Beneficiarios.
Poderán ser beneficiarios destas axudas:
1. Os/as emigrantes galegos/as, e os seus fillos, maiores de 18 anos, que posúan a condición de galego de acordo co que se establece no artigo 3º.2 do Estatuto de autonomía de Galicia. A forma de acreditar a devandita condición de galego sinálase no artigo 14º destas bases.
Para os efectos desta convocatoria terán a condición de emigrantes aqueles que teñan nacido en Galicia ou ben acrediten ter residido en Galicia de forma continuada durante dez anos, mediante calquera xustificación en documento oficial.
2. Os netos de emigrantes galegos, maiores de 18 anos, que posúan a condición de galegos de acordo co que se establece no artigo 3º.2 do Estatuto de autonomía de Galicia e acrediten un ano de residencia continuada en Galicia, mediante calquera xustificación en documento oficial.
3. No caso de falecemento das persoas indicadas nos puntos 1 e 2, e sempre e cando non transcorresen máis de quince meses desde o falecemento, o seu cónxuxe viúvo, os fillos, a parella de feito ou relación análoga, poderán ser beneficiarios das axudas previstas no artigo 5º destas bases.
Artigo 3º.-Requisitos xerais dos solicitantes.
Poderán solicitar estas axudas as persoas que cumpran e acrediten documentalmente os requisitos xerais que a continuación se sinalan:
1. Acreditar a condición de beneficiarios de acordo co que se dispón no artigo 2º destas bases.
2. Carecer de rendas, ingresos ou patrimonio.
a) Considerarase que existen rendas ou ingresos insuficientes cando aqueles dos que dispoña o interesado ou se prevexa que vai dispoñer en cómputo anual, sexan iguais ou inferiores á base de cálculo da prestación económica por ancianidade establecida polo Estado para o país de residencia (sen prexuízo das contías específicas dos artigos 4º e 10º.2 das bases), nas contías que se determinen para o exercicio do ano no que se convocan estas axudas, computándose todo tipo de rendas, mesmo as axudas públicas ou privadas.
Nos países en que non estea fixada a contía da prestación económica por ancianidade polo Estado español, as referencias establecidas nesta resolución, entenderanse referidas á contía da pensión non contributiva por xubilación do Estado español, determinada por este para o exercicio do ano no que se convocan estas axudas.
Malia o disposto no parágrafo anterior, se o solicitante carece de rendas ou ingresos suficientes, segundo o previsto nel, pero convive con outra ou outras persoas nunha mesma unidade económica familiar, a contía anterior virá determinada pola suma do límite máximo de ingresos persoais máis o resultado de multiplicar o 70 % da devandita cifra polo número de conviventes menos un.
Para os efectos do establecido neste punto, consideraranse rendas ou ingresos computables os bens ou dereitos de que dispoña anualmente o beneficiario ou a unidade económica familiar, derivados tanto do traballo coma do capital, así como calquera outro substitutivo daqueles.
b) Considerarase que existe patrimonio mobiliario suficiente cando existan bens mobles cun valor superior á base de cálculo da prestación económica por ancianidade en cómputo anual. Así mesmo, considerarase que existe patrimonio inmobiliario suficiente cando o valor patrimonial ou equivalente dos inmobles, agás a vivenda habitual, supere en 2,5 veces a base de cálculo da prestación económica por ancianidade en cómputo anual.
3. Non pertencer a organizacións, comunidades ou institucións, que polas súas regras ou estatutos, estean obrigados a prestarlles asistencia.
4. Ademais dos requisitos anteriores, en cada un dos supostos de axuda prevista nos seguintes artigos, os solicitantes terán que cumprir os requisitos específicos que se sinalen en cada un deles, tendo en conta que todos os requisitos deberán cumprirse na data de remate do prazo de presentación de solicitudes.
5. Entenderase como unidade económica familiar a integrada polo solicitante e, de ser o caso, o seu cónxuxe, parella de feito ou relación análoga, así como os fillos e parentes por consanguinidade, afinidade ou adopción ata o segundo grao sempre que convivan co solicitante.
Artigo 4º.-Axudas por atoparse a unidade familiar en situación de precariedade.
Poderán solicitar as axudas deste suposto as persoas que cumpran os requisitos xerais previstos no artigo 3º destas bases e nos específicos seguintes:
1. Ter 70 anos cumpridos.
2. Ter ingresos por calquera concepto da unidade económica familiar inferiores ao 25% da base de cálculo da prestación económica por ancianidade establecida polo Estado para 2011 para o país de residencia, computándose os ingresos na forma establecida no artigo 3º.2 a).
3. Residir nun país iberoamericano co que o Estado español non teña asinados convenios bilaterais en materia de Seguridade Social.
Artigo 5º.-Axudas por situación de dependencia ou enfermidade grave do solicitante.
Poderán solicitar as axudas deste suposto as persoas que cumpran os requisitos xerais previstos no artigo 3º destas bases e se atopen nalgún dos seguintes supostos:
a) Atoparse o/a solicitante, en situación de dependencia, que faga necesarios coidados e asistencia de terceiros.
Entenderase por situación de dependencia o estado de carácter permanente no que se atopan as persoas que, por razóns derivadas da idade, enfermidade ou discapacidade e ligadas á falla ou perda de autonomía física, mental, intelectual ou sensorial, precisan da atención doutra ou doutras persoas ou axudas importantes para realizar as actividades básicas da vida diaria, ou, no caso, das persoas con discapacidade intelectual ou enfermidade mental, doutros apoios para a súa autonomía persoal.
b) Padecer o/a solicitante unha enfermidade grave e carecer da correspondente cobertura para o seu tratamento ou atención médica.
Artigo 6º.-Axudas por situación de dependencia, ou enfermidade grave no seo da unidade familiar.
Poderán solicitar as axudas deste suposto as persoas que cumpran os requisitos xerais previstos no artigo 3º destas bases e estar o seu cónxuxe ou persoa coa que manteña unha unión de feito ou relación análoga, ou os seus fillos, nunha das seguintes situacións:
a) Atoparse en situación de dependencia, que faga necesarios coidados e asistencia de terceiros.
b) Padecer unha enfermidade grave e carecer da correspondente cobertura para o seu tratamento ou atención médica.
Artigo 7º.-Axudas por invalidez ou enfermidade permanente.
Poderán solicitar as axudas deste suposto as persoas que cumpran os requisitos xerais previstos no artigo 3º destas bases e aqueles específicos que se sinalan a continuación:
1. Ser maior de 18 anos e menor de 65.
2. Atoparse o/a solicitante en situación de invalidez ou enfermidade permanente que o incapacite para o desenvolvemento de calquera tipo de actividade laboral.
Artigo 8º.-Axudas para a cobertura de medicamentos e tratamentos de enfermidades crónicas ou graves, cando teñan un custo elevado.
Poderán solicitar as axudas deste suposto as persoas que cumpran os requisitos xerais previstos no artigo 3º destas bases e aqueles específicos que se sinalan a continuación:
1. Ter cumpridos 65 anos.
2. Padecer unha enfermidade crónica ou grave que requira dunha medicación ou tratamento de custo elevado e carezan da correspondente cobertura. Entenderase que o custo é elevado cando as cantidades destinadas a eses fins ascendan polo menos a un 6% da base de cálculo da prestación económica por ancianidade establecida polo Estado español para o país de residencia, nas contías que se determinen para o exercicio do ano no que se convocan estas axudas, en cómputo mensual. Entre os gastos derivados do tratamento da enfermidade crónica ou grave poderanse engadir, de ser o caso, os de copagamento de actos médicos.
Artigo 9º.-Axudas para as mulleres que sufran violencia de xénero.
Poderán solicitar as axudas deste suposto as mulleres que cumpran os requisitos xerais previstos no artigo 3º destas bases e aqueles específicos que se sinalan a continuación:
1. Ser maior de idade ou emancipada.
2. Sufrir unha situación de violencia de xénero acreditada.
Artigo 10º.-Axudas para paliar unha situación de desemprego na unidade económica familiar.
Poderán solicitar as axudas deste suposto as persoas que se encontren en situación legal de desemprego e que cumpran os requisitos xerais previstos no artigo 3º destas bases e aqueles específicos que se sinalan a continuación:
1. Ser maior de 50 anos e menor de 65.
2. Que os ingresos por calquera concepto da unidade económica familiar non superen a metade da base de cálculo da prestación económica por ancianidade establecida polo Estado no país de residencia, para o exercicio en que se publica a convocatoria, computándose os ingresos do xeito establecido no artigo 3º.2 a) destas bases.
Artigo 11º.-Réxime de concesión e contías das axudas.
O importe das axudas estará condicionado polo orzamento previsto na correspondente convocatoria anual na que se recollerán os límites que se aplicarán en caso de variar os previstos nestas bases.
1. As solicitudes presentadas conforme o artigo 4º das bases, Axudas por atoparse a unidade económica familiar en situación de precariedade en países iberoamericanos nos que o Estado español non teña asinados convenios en materia de Seguridade Social, tramitarase na modalidade de concorrencia non competitiva, segundo o previsto no artigo 19º.3 da citada Lei 9/2007, tendo en conta as especiais características destas axudas, así como a dificultade obxectiva de realizar unha comparación ou prelación das solicitudes presentadas. O importe fixarase en función do número de solicitudes e as dispoñibilidades orzamentarias e non poderá superar a contía mínima das axudas que se concederán no resto dos supostos previstos netas bases.
Así mesmo, se o número de solicitudes admitidas fose tal que a contía individual por axuda resultase inferior a 200 euros, denegaríanse aquelas solicitudes correspondentes ás persoas de menos idade ata acadar o dito mínimo de 200 euros.
2. O réxime de concesión das axudas económicas nos supostos previstos nos artigos 5º, 6º, 7º, 8º, 9º e 10º destas bases que rexen a convocatoria, tendo en conta as especiais características destas axudas, tramitaranse igualmente polo procedemento de concorrencia non competitiva, se ben nestes supostos, o importe da axuda outorgarase en función da puntuación obtida ao aplicar os criterios de valoración establecidos no artigo 17º das bases reguladoras.
Á vista dos informes de valoración efectuada, establecerase a contía da axuda que estará limitada para os países que teñan asinados convenios en materia de Seguridade Social co Estado español, cunha cota inferior de 350 euros e unha cota superior de 900 euros, e os países que non teñan asinados convenios en materia de Seguridade Social co Estado español, unha cota inferior de 200 euros e unha cota superior de 500 euros.
O importe da axuda estará en función da avaliación obtida en aplicación dos criterios establecidos no artigo 17º, tendo en conta a gravidade do suposto polo que se solicita, ordenándose en orde decrecente segundo os artigos correspondentes a cada suposto tal e como se sinala a continuación: 5º, 7º, 8º, 10º, 9º e 6º. A distribución da puntuación será proporcional, establecéndose unha orde de maior a menor en cada suposto, e segundo a prelación de cada un deles. O importe da axuda será fixado en relación coa puntuación obtida de forma que, a máis puntuación, maior será a contía da axuda.
Cando nunha mesma unidade económica familiar concorra máis dun beneficiario, a contía das axudas será minorada nun 70%, agás a do suposto de maior gravidade. No caso de ser o mesmo suposto, minorarase a de menor puntuación, e, de ser a mesma, a de menor idade.
Cando o solicitante resida nun centro asistencial ou similar, a contía máxima da axuda non superará a diferenza entre o custo do centro e os ingresos acreditados polo solicitante. En todo caso non superará o importe previsto na convocatoria.
Artigo 12º.-Natureza das axudas.
1. As axudas teñen carácter persoal e intransferible. As axudas non orixinan ningún dereito subxectivo para os beneficiarios e estarán, en todo caso, condicionadas ás dispoñibilidades orzamentarias do exercicio correspondente, previstas para esta finalidade.
No suposto de que, unha vez ditada a resolución de concesión das axudas, o/a beneficiario/a falecese, terán dereito á súa percepción as persoas que acrediten, de acordo coa normativa do país de residencia, a súa condición de herdeiros/as.
2. Soamente se poderá conceder unha axuda por feito causante. As axudas previstas nos artigos 4º e 10º destas bases son incompatibles coa solicitude de axudas por outro suposto na mesma unidade económica familiar.
A axuda que se conceda corresponderá co suposto de maior gravidade, de ser da mesma gravidade coa de maior puntuación, e de ser esta a mesma, co solicitante de maior idade.
4. Cada solicitante soamente poderá pedir unha axuda por un único suposto. De presentarse máis dunha solicitude, entenderase como válida a presentada en primeiro lugar, segundo o asento de rexistro correspondente.
Artigo 13º.-Competencia, instrución.
1. A competencia para resolver as solicitudes de axudas presentadas ao abeiro desta resolución correspóndelle ao secretario xeral da Emigración.
2. O órgano instrutor será a Subdirección Xeral de Programas Sociais e ademais crearase unha comisión de avaliación presidida polo subdirector xeral de Programas Sociais ou persoa en que delegue, e composta polos seguintes membros:
-O xefe do servizo de Acción Social ou persoa en quen delegue.
-Un/unha funcionario/a da unidade que actuará como secretario/a.
3. Para as solicitudes presentadas en Arxentina e Uruguai crearanse comisións de avaliación presididas polos delegados da Xunta de Galicia en Buenos Aires e Montevideo respectivamente. Para as solicitudes presentadas en Brasil, Cuba e Venezuela poderanse crear comisións de avaliación, presididas por un funcionario técnico da Secretaría Xeral da Emigración. Estas comisións estarán compostas por técnicos das delegacións e, se é o caso, por membros dos centros galegos de cada país como representantes das comunidades galegas coñecedores da realidade social na que residen, viven e se desenvolven os solicitantes. Estas comisións avaliarán as solicitudes presentadas tendo en conta o previsto nas bases reguladoras.
4. Os expedientes, que non fosen avaliados polas comisións mencionadas no artigo 13º.3, serán avaliados pola comisión de avaliación indicada no artigo 13º.2, tendo en conta o previsto nas bases reguladoras.
5. Se algunha das comisións de avaliación citadas así o estimase, poderá encargar informes socio-ambientais, que se realizarán por profesionais titulados, que comproben a veracidade dos datos achegados nas solicitudes, debendo os resultados obtidos ser tidos en conta na avaliación das correspondentes solicitudes.
6. Os expedientes serán avaliados polas comisións segundo os criterios de valoración establecidos nestas bases para os distintos programas. Posteriormente, a comisión de avaliación a que se refire o punto 2 deste artigo, elaborará unha proposta de concesión que se elevará por parte do órgano instrutor ao/á secretario/a xeral da Emigración, para a súa resolución.
7. Correspóndelle á Secretaría Xeral da Emigración a realización das tarefas de xestión desta convocatoria, sempre de acordo coa existencia das dispoñibilidades orzamentarias.
Artigo 14º.-Acreditación da condición de galego residente no exterior.
A condición de galego residente no exterior deberá acreditarse mediante a presentación da seguinte documentación:
a) A nacionalidade española mediante o pasaporte español en vigor, o certificado de inscrición no Rexistro de Matrícula Consular ou outro documento xustificativo que acredite a nacionalidade española. No documento presentado debe constar a dilixencia de inscrición no Rexistro de Matrícula Consular, agás en casos de imposibilidade de obtención.
b) A orixe galega xustificarase mediante calquera documento oficial que acredite un dos dous requisitos seguintes:
1. Ser nado en Galicia ou que a última veciñanza administrativa en España fose en Galicia.
2. Que se atope vinculado con calquera concello galego no censo electoral de residentes no exterior e sexa descendente ata o segundo grao de consanguinidade dunha das persoas descritas na letra b). A vinculación cun concello galego no censo de residentes no exterior non se exixirá no caso de que o/a solicitante/a estea incapacitado legalmente, sempre que a devandita incapacidade impida a inscrición no devandito censo.
Artigo 15º.-Documentación e lugar de presentación de solicitudes.
1. Todos os solicitantes deberán presentar a seguinte documentación:
a) Solicitude segundo o modelo normalizado do anexo II desta resolución. No caso de que os solicitantes sexan incapacitados, asinará a solicitude o seu representante legal.
No modelo da solicitude inclúese unha declaración do conxunto de todas as solicitudes de axuda efectuada, con expresión das que foron concedidas polas distintas administracións públicas competentes.
b) Para os solicitantes que estean en posesión do DNI español, autorización á Secretaría Xeral da Emigración para realizar a verificación telemática dos seus datos identificativos. Para o resto, fotocopia do pasaporte español ou documento de identidade en que consten os seus datos persoais. Para todos, acreditación documental da condición de galego residente no exterior, de acordo co artigo anterior.
c) Para os casos mencionados nos puntos 1 e 2 do artigo 2º, xustificación oficial da residencia en Galicia.
d) Documentación que acredite a convivencia familiar, se é o caso.
e) Libro de familia, se procede. No seu defecto, achegarase documentación xustificativa do matrimonio, da unión de feito ou relación análoga e do nacemento do resto de membros da unidade familiar. As relacións maritais análogas ao matrimonio terán que acreditar que levan convivindo polo menos un ano, e tal circunstancia poderase probar por medio da inscrición no rexistro, por manifestación expresa mediante acta de notoriedade ou por calquera outro medio admisible en dereito. No caso de teren fillos en común abondará con acreditar a convivencia, segundo o que se establece na Lei 2/2006, de dereito civil de Galicia.
f) No caso de separación legal ou divorcio, anexarase a correspondente sentenza xudicial firme ou certificación rexistral.
g) Nos países nos que exista obriga de presentar declaración da renda das persoas físicas ou declaración similar, copia da última declaración presentada do interesado e/ou os membros da unidade económica familiar. No caso de que non estivesen obrigados a realizala, xustificación oficial desta circunstancia, nos países nos que se expida, e certificación ou xustificante acreditativo dos ingresos, rendas ou pensións de calquera natureza que perciba o interesado e/ou os membros da unidade económica familiar ou, de non percibirse, declaración responsable do solicitante de que ningún membro da unidade económica familiar, incluído o interesado, percibe ingresos, rendas ou pensión de calquera natureza.
h) Nos países en que non exista deber de presentar declaración da renda das persoas físicas ou declaración similar, certificación ou xustificante acreditativo dos ingresos, rendas ou pensións de calquera natureza que perciba o interesado e/ou os membros da unidade económica familiar, ou, de non percibirse, declaración responsable do solicitante de que ningún membro da unidade económica familiar, incluído o interesado, percibe ingresos, rendas ou pensións de calquera natureza.
i) No caso de residir o solicitante nun centro asistencial ou similar, deberá presentar xustificante do custo mensual do devandito centro.
j) Certificado catastral ou documentación similar na que conste o valor patrimonial dos bens inmobles, agás a vivenda habitual, dos que dispoñan os membros da unidade económica familiar.
De non existir no país de residencia a posibilidade de expedición do devandito certificado catastral, abondará con presentar unha declaración responsable na que conste o valor patrimonial dos bens inmobles, agás a vivenda habitual, de que dispoñan os membros da unidade económica familiar.
k) Declaración responsable, asinado polo/a beneficiario/a da axuda, de estar ao día no cumprimento das súas obrigas coa Axencia Estatal da Administración Tributaria, a Tesourería Xeral da Seguridade Social e de non ter pendente de pagamento ningunha débeda, por ningún concepto, coa Administración pública da Comunidade Autónoma de Galicia, segundo o modelo do anexo II da resolución desta convocatoria de axudas. Isto en aplicación do artigo 11º h) do Decreto 11/2009, do 8 de xaneiro, polo que se aproba o regulamento da Lei 9/2007, do 13 de xuño, de subvencións de Galicia.
l) Outros documentos xustificativos do estado de necesidade que fundamenten a solicitude de axuda, completen e faciliten a graduación do estado de necesidade.
Os solicitantes que fosen beneficiarios do programa de axudas económicas individuais a galegos residentes no exterior para o exercicio de 2010, convocada por resolución da Secretaría Xeral da Emigración do 16 de febreiro de 2010, non terán que presentar a documentación establecida nos parágrafos b), d), e) e f), sempre que presenten a declaración xurada que figura como anexo III desta resolución.
2. Ademais, para cada caso concreto, deberán achegar a seguinte documentación:
2.1. Para os casos de dependencia ou enfermidade grave descritas no artigo 5º e 6º, documento oficial no que se acredite o recoñecemento da dependencia ou enfermidade grave, emitido polo sistema público do país de residencia. Nos países nos que este documento non se expedise: certificado médico, segundo modelo normalizado do anexo IV, realizado polos servizos médicos dunha sociedade galega ou española que preste servizos na área de saúde. Cando o certificado médico anterior non poida ser expedido pola sociedade galega ou española aludida, poderá admitirse como válido un certificado médico expedido por calquera centro de saúde pública oficial (centros médicos nacionais, provinciais ou municipais) do país de residencia, preferentemente referendado pola dirección médica das devanditas sociedades galegas ou españolas, naqueles lugares en que estas existan. Será causa de exclusión a presentación de certificados médicos en modelos distintos ao normalizado do anexo IV.
2.2. Para os casos de invalidez ou enfermidade permanente previstos no artigo 7º, documento oficial en que se acredite o recoñecemento da invalidez ou enfermidade permanente, emitido polo sistema público do país de residencia. Nos países nos que este documento non se expedise, certificado médico segundo o modelo normalizado do anexo V nos mesmos termos que os descritos no punto anterior.
2.3. Para os casos de cobertura de medicamentos e tratamento de enfermidades crónicas ou graves previstos no artigo 8º:
a) Certificado médico, segundo o modelo normalizado do anexo VI, nos mesmos termos que o descrito no punto 2.1.
b) Xustificación dos gastos mensuais en medicamentos efectivamente aboados polo solicitante, no modelo normalizado do anexo VII conforme as prescricións médicas establecidas no certificado indicado na letra a) e, de ser o caso, xustificación dos outros gastos mensuais efectuados no tratamento da enfermidade.
2.4. Para os casos de violencia de xénero do artigo 9º, acreditación de sufrir a situación de violencia de xénero mediante sentenza, orde xudicial de protección, informe do Ministerio Fiscal ou informe socio-ambiental emitido por organismo oficial.
2.5. Para os casos de desemprego xeneralizado na unidade familiar previstos no artigo 10º, xustificantes da situación de desemprego, coa indicación de se é subsidiado ou non, do cabeza de familia e do resto dos membros que compón a unidade familiar e que estean nesa situación.
3. Se a solicitude non estivese debidamente cuberta ou non se achegase a documentación exixida, a Secretaría Xeral da Emigración requirirá ao interesado para que, nun prazo máximo de dez días hábiles, emende a falta ou achege os documentos preceptivos, con indicación de que, se así non o fixer, se entenderá por desistida a súa petición, de conformidade co que se dispón no artigo 71º da Lei 30/1992, de réxime xurídico da administracións públicas e do procedemento administrativo común, logo da resolución ditada nos termos previstos no artigo 42º da Lei 30/1992.
4. A falsidade ou ocultación de datos na documentación presentada para a obtención da axuda, comportará a exclusión do proceso de valoración e, polo tanto, a imposibilidade de ser beneficiario das axudas establecidas nesta resolución.
5. Lugar de presentación das solicitudes.
As solicitudes presentaranse, xunto co resto da documentación, na Secretaría Xeral da Emigración ou en calquera dos lugares previstos no artigo 38º.4 da Lei 30/1992, do 26 de novembro, de réxime xurídico das administracións públicas e do procedemento administrativo común (entre os que figuran a Delegación da Xunta de Galicia en Buenos Aires, Delegación da Xunta de Galicia en Montevideo, Consellerías de Traballo e Asuntos Sociais, nas Seccións de Traballo e Asuntos Sociais das Oficinas Consulares, así como nos consulados ou seccións consulares das embaixadas correspondentes ao domicilio ou residencia do solicitante).
Para a presentación destas solicitudes os interesados poderán utilizar o Rexistro Telemático da Xunta de Galicia de conformidade co Decreto 164/2005, do 16 de xuño, polo que se regulan e determinan as oficinas de rexistro propias ou concertadas da Administración da Comunidade Autónoma de Galicia, se procede á creación do Rexistro Telemático da Xunta de Galicia e se regula a atención ao cidadán.
Os interesados que así o desexen, poderán dirixirse ás entidades colaboradoras que se sinalan a continuación, para a presentación telemática das súas solicitudes:
*En Brasil:
-Peña Galega da Casa de España de Río de Janeiro.
-Real Sociedade Española de Beneficencia de Salvador-Bahía.
-Sociedade Hispano Brasileira de Socorros Mutuos e Instrución en São Paulo.
-Sociedade de Socorros Mutuos e Beneficente Rosalía de Castro en Santos.
*En Cuba:
-Federación de Sociedades Galegas na Habana.
*En Venezuela:
-Irmandade Galega de Venezuela en Caracas.
A utilización desta vía requirirá unha autorización que o interesado lle outorga á persoa responsable da entidade colaboradora para que remita a súa solicitude por vía telemática. Esa autorización farase constar no modelo de solicitude.
Artigo 16º.-Tramitación.
O procedemento para a tramitación e concesión das axudas que se convocan nesta resolución axustarase ao previsto no Decreto 11/2009, do 8 de xaneiro, polo que se aproba o regulamento da Lei 9/2007, do 13 de xuño, de subvencións de Galicia e na Lei 30/1992, do 26 de novembro, de réxime xurídico das administracións públicas e do procedemento administrativo común.
Artigo 17º.-Criterios de valoración.
Os criterios de valoración para o outorgamento das axudas serán os que se sinalan a continuación, tendo en conta que a distribución da puntuación será proporcional establecéndose unha orde de maior a menor en cada suposto e segundo a prelación de cada un deles establecida no artigo 11º.
1. Para os supostos dos artigos 5º e 6º:
a) Grao de dependencia de terceiros/gravidade da enfermidade: de 1 a 4 puntos.
b) Ingresos económicos e patrimonio: de 1 a 3 puntos.
c) Idade do solicitante: de 1 a 2 puntos.
2. Para o suposto do artigo 7º:
a) Grao de autonomía: de 1 a 4 puntos.
b) Ingresos económicos e patrimonio: de 1 a 3 puntos.
c) Idade do/da solicitante: de 1 a 2 puntos.
3. Para o suposto do artigo 8º:
a) Gasto farmacéutico: de 1 a 4 puntos.
b) Ingresos económicos e patrimonio: de 1 a 3 puntos.
c) Idade do solicitante: de 1 a 2 puntos.
4. Para o suposto do artigo 9º:
a) Cargas familiares do/a solicitante, considerandose para tal fin os menores de 24 anos ou maiores desta idade discapacitados que dependan economicamente do/da solicitante: de 1 a 4 puntos.
b) Ingresos económicos e patrimonio dos que dispón o/a solicitante: de 1 a 3 puntos.
c) Idade do/da solicitante: de 1 a 2 puntos.
5. Para o suposto do artigo 10º:
a) Cargas familiares da unidade económica familiar, considerandose para tal fin os menores de 24 anos ou maiores desta idade discapacitados que dependan economicamente do/da solicitante: de 1 a 4 puntos.
b) Ingresos económicos e patrimonio dos que dispón o/a solicitante: de 1 a 3 puntos.
c) Idade do/a solicitante: de 1 a 2 puntos.
Artigo 18º.-Resolución. Modificación da resolución de concesión e reintegro.
1. As resolucións seranlles notificadas aos interesados, debendo ser sempre motivadas.
O prazo máximo para resolver será de seis meses. Transcorrido o devandito prazo sen que se ditasen as resolucións expresas, poderán entenderse desestimadas as solicitudes, de acordo co establecido no artigo 23º.5 da Lei 9/2007, do 13 de xuño, de subvencións de Galicia.
2. Os beneficiarios das axudas quedan obrigados a comunicarlle á Secretaría Xeral da Emigración, no momento en que se produza, calquera alteración dos requisitos exixidos na convocatoria ou de circunstancias sobrevidas que impidan ou dificulten a execución das accións para as que se solicitou a axuda, podendo a secretaría adoptar a resolución de modificación da concesión ou de revogación que corresponda.
3. Procederase ao reintegro total ou parcial das cantidades percibidas e a exixencia dos xuros de mora endebedados desde o momento en que se efectúe o pagamento nos casos sinalados no artigo 33º da Lei 9/2007, do 13 de xuño, de subvencións de Galicia. De acordo co artigo 14º.1 n) da Lei 9/2007, os criterios de graduación dos posibles incumprimentos para determinar a cantidade que se minorá ou reintegrará serán os seguintes:
-O incumprimento total dos fins para os que se concede a subvención, da realización dos gastos subvencionables ou da obriga de xustificación, dará lugar á perda do dereito ao cobramento ou, se é o caso, ao reintegro da totalidade da axuda concedida.
-Calquera outro incumprimento considerarase incumprimento parcial dos fins para os que se concedeu a axuda da realización dos gastos subvencionables ou da obriga de xustificación, e dará lugar á perda do dereito ao cobramento ou, se é o caso, ao reintegro na porcentaxe correspondente ao investimento non efectuado ou non xustificada.
Artigo 19º.-Deberes dos beneficiarios.
Os beneficiarios quedan obrigados a presentar, antes de cada pagamento da axuda, unha declaración complementaria do conxunto das axudas solicitadas, tanto as aprobadas ou concedidas como as pendentes de resolución, para a mesma finalidade, das distintas administracións públicas competentes ou das súas entidades vinculadas ou dependentes ou de entidades privadas.
Así mesmo, presentará unha declaración asinada de estar ao corrente no cumprimento das súas obrigas coa Axencia Estatal da Administración Tributaria, a Tesourería Xeral da Seguridade Social e de non ter pendente de pagamento ningunha débeda, por ningún concepto, coa Administración pública da Comunidade Autónoma de Galicia.
Os beneficiarios de axudas e subvencións correspondentes aos programas convocados por esta resolución quedan obrigados a someterse aos requisitos legais e regulamentarios que prevexa a normativa xeral de aplicación ás axudas e subvencións da Xunta de Galicia, así como ás actuacións de comprobación que respecto da xestión de fondos pode efectuar a entidade concedente e ás de control financeiro que realice a Intervención Xeral da Comunidade Autónoma e aos procedementos fiscalizadores do Tribunal de Contas e do Consello de Contas.
De conformidade coa Lei orgánica 1/1982, do 5 de maio, de protección civil do dereito ao honor, á intimidade persoal e familiar e a propia imaxe e co disposto no artigo 9º.4 do Decreto 132/2006, do 27 de xullo, polo que se regulan os rexistros públicos creados nos artigos 44º e 45º da Lei 7/2005, do 29 de decembro, de orzamentos xerais da Comunidade Autónoma de Galicia para o ano 2006, e de conformidade co artigo 13º.6 da Lei 4/2006, do 30 de xuño, de transparencia e boas prácticas na Administración pública galega, non se procederá á publicidade destas axudas na páxina web da Secretaría Xeral da Emigración www.galiciaaberta.com e no Diario Oficial de Galicia, nin a relación de beneficiarios nin o importe das axudas concedidas, porque a súa publicación podería ser contraria ao respecto e salvagarda do honor e intimidade persoal e familiar dos solicitantes.
Os datos persoais recollidos en virtude desta convocatoria serán obxecto de tratamento por parte da Secretaría Xeral da Emigración, e serán incorporados a un ficheiro que cumpra as exixencias da Lei 15/1999, do 13 de decembro, de protección de datos de carácter persoal, adoptándose tanto as medidas de seguridade técnica como organizativas. A finalidade de recollida dos datos será o rexistro, estudo e avaliación das axudas convocadas nesta resolución, co fin de exercer as competencias propias da Secretaría Xeral da Emigración.
O solicitante autoriza expresamente a Secretaría Xeral da Emigración, no ámbito das súas competencias, a ceder os datos persoais a aqueles organismos da Administración xeral do Estado con competencias xerais na materia, co fin de colaborar no exercicio das funcións que lle sexan propias.
O interesado, así como o seu representante legal, poderán exercitar os dereitos de acceso, cancelación, rectificación e oposición por escrito e achegando identificación suficiente ao seguinte enderezo: Secretaría Xeral da Emigración, rúa Os Basquiños 2, CP 15074 Santiago de Compostela, A Coruña.
Artigo 20º.-Recursos.
As resolucións que se diten neste procedemento esgotan a vía administrativa, e contra elas cabe interpoñer potestativamente recurso de reposición ante o mesmo órgano que as ditou, no prazo dun mes contado a partir do día seguinte ao da recepción da correspondente notificación, no caso de resolucións expresas, ou no prazo de 3 meses contados a partir do día seguinte a aquel en que se entenda producido o acto presunto, no caso de resolucións desestimadas por silencio administrativo, de acordo co que se dispón na Lei 30/1992, do 26 de novembro, de réxime xurídico das administracións públicas e do procedemento administrativo común.
Así mesmo, poderá interpoñerse recurso contencioso-administrativo ante o Tribunal Superior de Xustiza de Galicia, no prazo de dous meses contados a partir do día seguinte ao da recepción da correspondente notificación, de acordo co establecido na Lei 29/1998, do 13 de xullo, da xurisdición contencioso-administrativa.
Non se poderá interpoñer recurso contencioso-administrativo ata que sexa resolto expresamente ou se producise a desestimación presunta do recurso de reposición interposto.
Ver referencia pdf "24300D001P006.PDF"
