A execución dos traballos de loita contra os incendios forestais poden ocasionar ás veces distintos danos nos bens e terreos dos particulares. Estes danos, derivados do funcionamento desta Administración pública, son indemnizables mediante a tramitación dos oportunos expedientes de responsabilidade patrimonial.
Estes expedientes implican a realización de diversos trámites e a súa duración é prolongada, polo que os particulares tardan bastante tempo en obter a reparación desde que o dano se produciu.
Non obstante, a tramitación pode minorarse se se acorda a terminación convencional dos procedementos cos propietarios reclamantes, e acórdase fixar a indemnización económica ou a reparación dos danos directamente con medios propios da Administración nos supostos en que exista unha contía determinada inferior a 1.500 euros, cantidade coincidente cos expedientes que requiren ditame do Consello Consultivo de Galicia.
Dado o elevado número de expedientes desta natureza, convén que a facultade que reside no conselleiro, conforme o artigo 34º da Lei 1/1983, do 22 de febreiro, da Xunta de Galicia e da súa Presidencia, para a sinatura destes actos, sexa delegada nos xefes territoriais por razón da súa competencia, en virtude do previsto no Decreto 245/2009, do 30 de abril, polo que se regulan as delegacións territoriais da Xunta de Galicia.
A delegación de competencias permite a axilización administrativa necesaria que redunda no beneficio, tanto da Administración como dos administrados, dentro do máis rigoroso respecto ás garantías xurídicas que a tutela dos intereses públicos exixe.
Por isto, facendo uso das facultades que me confire o artigo 43º.3 da Lei 1/1983, do 22 de febreiro, reguladora da Xunta e da súa Presidencia, e o artigo 13º da Lei 30/1992, do 26 de novembro, de réxime xurídico das administracións públicas e do procedemento administrativo común, e demais disposicións de xeral aplicación,
DISPOÑO:
Artigo 1º
Modifícase a Orde do 1 de xuño de 2009, pola que se delegan competencias nos xefes territoriais da Consellería do Medio Rural, introducindo un novo artigo 2º que queda redactado da seguinte maneira:
«Artigo 2º
Delégase nos xefes territoriais da Consellería do Medio Rural o exercicio da competencia, que corresponde ao conselleiro, para a resolución de expedientes nos cales se acorda a terminación convencional dos procedementos de responsabilidade patrimonial cuxa contía reclamada sexa inferior a 1.500 euros».
Artigo 2º
Modifícase a Orde do 24 de abril de 2009 sobre delegación de competencias no secretario xeral, no seu artigo sexto.1 c), que queda redactado da seguinte maneira:
«c) Resolver as reclamacións previas á vía civil e os procedementos de responsabilidade patrimonial a que se refire a Lei 30/1992, de réxime xurídico das administracións públicas e do procedemento administrativo común, agás aqueles expedientes de responsabilidade patrimonial de contía inferior a 1.500 euros en que se acorde a terminación convencional dos procedementos, incluíndo, se é o caso, as correspondentes reclamacións contra as entidades de dereito público adscritas á consellería».
Disposición derradeira
Esta orde entrará en vigor o día seguinte ao da súa publicación no Diario Oficial de Galicia.
Santiago de Compostela, 25 de novembro de 2010.
Samuel Jesús Juárez Casado
Conselleiro do Medio Rural