A Consellería do Medio Rural publicou o 29 de decembro de 2009 a Orde do 21 de decembro de 2009 pola que se establecen as bases reguladoras das axudas á utilización de servizos de aconsellamento por persoas titulares de explotacións agrarias, e se convocan para o ano 2010. Estas axudas convocáronse amparadas no disposto no Regulamento 1698/2005, do 20 de setembro, relativo á axuda ao desenvolvemento rural a través do Fondo Europeo Agrícola de Desenvolvemento Rural (Feader), e no Regulamento 1974/2006 da Comisión, do 15 de decembro, polo que se establecen disposicións de aplicación do anterior.

A Lei 9/2007, do 13 de xuño, de subvencións de Galicia (DOG nº 121, do 25 de xuño) establece no seu artigo 31 que poderán realizarse pagamentos á conta, os cales responderán ao ritmo de execución das accións subvencionadas, e aboaranse por contía equivalente á xustificación presentada.

Así mesmo, o Decreto 11/2009, do 8 de xaneiro, polo que se aproba o Regulamento da Lei 9/2007, do 13 de xuño, de subvencións de Galicia (DOG nº 20, do 29 de xaneiro) establece no seu artigo 62 que o importe conxunto dos pagamentos á conta que se conceda non poderá ser superior ao 80% da porcentaxe subvencionada correspondente aos pagamentos xustificados, nin excederá á anualidade prevista en cada exercicio orzamentario. Ademais establece, no seu artigo 65, que quedarán exonerados da constitución de garantía sobre o dito pagamento á conta os beneficiarios das subvencións concedidas cuxos pagamentos non superen os 18.000 euros.

Por outra banda o sector agrario da nosa comunidade autónoma está a sufrir os graves efectos da crise económica, o cal pode afectar de xeito importante a viabilidade económica das explotacións agrarias galegas.

Por todo o anterior considérase necesario modificar as bases reguladoras da Orde do 21 de decembro de 2009 pola que se establecen as bases reguladoras das axudas á utilización de servizos de aconsellamento por persoas titulares de explotacións agrarias, e se convocan para o ano 2010, establecendo o procedemento de pagamento á conta referido na Lei 9/2007 e no Decreto 11/2009, respectivamente.

De conformidade co previsto no artigo 30.1º 3 do Estatuto de autonomía de Galicia e no uso das facultades que confiren os artigos 7 e 14 da Lei 9/2007, do 13 de xuño, de subvencións de Galicia e de acordo co disposto na Lei 1/1983, do 22 de febreiro, de normas reguladoras da Xunta e da súa Presidencia e demais normativa concorrente,

DISPOÑO:

Artigo único.-Modificación da Orde do 21 de decembro de 2009 pola que se establecen as bases reguladoras das axudas á utilización de servizos de aconsellamento por persoas titulares de explotacións agrarias, e se convocan para o ano 2010 (DOG nº 252, do 29 de decembro de 2009).

A Orde do 21 de decembro de 2009 pola que se establecen as bases reguladoras das axudas á utilización de servizos de aconsellamento por persoas titulares de explotacións agrarias, e se convocan para o ano 2010, modifícase nos seguintes termos:

Un. Engádeselle o número 8 ao artigo 7º, que queda redactado como segue:

«a) Poderán realizarse pagamentos á conta, os cales poderán supoñer a realización de pagamentos fraccionados que responderán ao ritmo de execución das accións subvencionadas, e aboaranse por contía equivalente á xustificación presentada.

b) O importe conxunto dos ditos pagamentos á conta non poderá ser superior ao 80% da porcentaxe subvencionada correspondente aos pagamentos xustificados, nin excederá a anualidade prevista en cada exercicio orzamentario.

c) De acordo co suposto previsto no artigo 65.4º do Decreto 11/2009, do 8 de xaneiro, polo que se aproba o Regulamento da Lei 9/2007, do 13 de xuño, de subvencións de Galicia, os beneficiarios destas subvencións quedan exonerados da constitución de garantías, por non superarse o límite establecido nese artigo, segundo se establece no anexo do Regulamento 1698/2005, do 20 de setembro, relativo á axuda ao desenvolvemento rural a través do Fondo Europeo Agrícola de Desenvolvemento Rural (Feader)».

Disposicións adicionais

Primeira.-Facúltase o director xeral de Produción Agropecuaria para ditar cantas disposicións complementarias considere oportunas para a aplicación e execución desta orde.

Segunda.-Esta orde entrará en vigor o día seguinte ao da súa publicación no Diario Oficial de Galicia.

Santiago de Compostela, 13 de outubro de 2010.

Samuel Jesús Juárez Casado

Conselleiro do Medio Rural