O Decreto 28/2009, do 29 de xaneiro, polo que se crea a reserva mariña de interese pesqueiro Ría de Cedeira, define aqueles elementos esenciais que determinan o funcionamento da reserva como unha ferramenta de xestión dos recursos cunha filosofía participativa do sector nela.

Así, no punto 2 do seu artigo 8, no cal se establecen as condicións de acceso, consta que para realizar as actividades pesqueiras e marisqueiras profesionais autorizadas na reserva será necesario estar inscrito nun censo específico de titulares dos permisos que os habilite para exercer esas actividades.

Na reunión do órgano de xestión, seguimento e control da reserva, do 5 de maio de 2010, acórdase abrir inmediatamente o prazo para a presentación de solicitudes para a inscrición no censo, unha vez publicada a orde que regule o uso e xestión da reserva mariña.

Finalmente, a Orde do 18 de agosto de 2010, pola que se regula o uso e xestión da reserva mariña de interese pesqueiro Ría de Cedeira, define no seu artigo 3 o procedemento que cómpre seguir para a elaboración do censo de titulares de permisos que os habilite para exercer a actividade nela.

Así pois, para dar cumprimento ao anteriormente exposto,

DISPOÑO:

Primeiro.-Prazo de presentación de solicitudes.

O prazo de presentación de solicitudes para a inscrición de titulares de permisos para exercer a actividade pesqueira e marisqueira na reserva mariña de interese pesqueiro Ría de Cedeira será dun mes contado desde o día seguinte ao da publicación desta resolución no Diario Oficial de Galicia.

Segundo.-Solicitude.

As solicitudes formalizaranse no modelo que se publica como anexo I da Orde do 18 de agosto de 2010 pola que se regula o uso e xestión da reserva mariña de interese pesqueiro Ría de Cedeira (DOG nº 173, do 8 de setembro).

Presentaranse no rexistro da Consellería do Mar ou en calquera dos lugares previstos no artigo 38 da Lei 30/1992, do 26 de novembro de 1992, de réxime xurídico das administracións públicas e do procedemento administrativo común, acompañadas de copia do DNI da persoa que asine a solicitude, só no caso de non autorización ao órgano xestor, para comprobar os datos de identidade mediante consulta ao sistema de verificación de datos, segundo o Decreto 255/2008, do 23 de outubro (DOG nº 221, do 13 de novembro) e a Orde do 7 de xullo de 2009 (DOG nº 134, do 10 de xullo).

Contra esta resolución, que non esgota a vía administrativa, poderá interpoñerse recurso de alzada no prazo dun mes, contado desde o día seguinte ao da súa publicación, ante a conselleira do Mar, de conformidade co disposto nos artigos 114 e 115 da Lei 30/1992, do 26 de novembro, de réxime xurídico das administracións públicas e do procedemento administrativo común.

Santiago de Compostela, 22 de setembro de 2010.

Pablo R. Fernández Asensio

Director xeral de Ordenación e Xestión dos Recursos Mariños