O día 7 de abril de 2010 publicouse no Diario Oficial de Galicia a Orde do 29 de marzo de 2010, pola que se anuncian axudas económicas destinadas a subvencionar a realización de obras e equipamento para a prestación de servizos municipais nos concellos e nas entidades menores de Galicia.
No artigo 10.1º establécese que as entidades beneficiarias da subvención deberán presentar a documentación xustificativa antes do 15 de outubro de 2010. Porén, por causas sobrevidas, o prazo establecido resulta de difícil cumprimento, polo que para facer viable o proceso de xestión, e co fin de garantir a maior eficacia posible da convocatoria das referidas subvencións, e dado que non se causa prexuízo a terceiros, é procedente ampliar o dito prazo para a súa xustificación.
De acordo co anterior, vista a Lei 9/2007, do 13 de xuño, de subvencións de Galicia, e o Decreto 11/2009, do 8 de xaneiro, polo que se aproba o seu regulamento,
DISPOÑO:
Artigo único.-Modificación do artigo 10 da Orde do 29 de marzo de 2010 pola que se anuncian axudas económicas destinadas a subvencionar a realización de obras e equipamento para a prestación de servizos municipais nos concellos e nas entidades menores de Galicia.
O primeiro parágrafo do número 1º do artigo 10 da referida orde queda redactado nos seguintes termos:
«1. As entidades beneficiarias da subvención presentarán, antes do 1 de novembro do ano correspondente ao exercicio económico da respectiva anualidade, a seguinte documentación: ( )».
Disposición derradeira
Esta orde entrará en vigor o día seguinte ao da súa publicación no Diario Oficial de Galicia.
Santiago de Compostela, 4 de outubro de 2010.
Alfonso Rueda Valenzuela
Conselleiro de Presidencia, Administracións Públicas e Xustiza