Pola Orde, do 29 de xaneiro de 2009, da Consellería do Medio Rural (Diario Oficial de Galicia nº 24, do 4 de febreiro), modificada pola Orde do 19 de febreiro de 2010 (Diario Oficial de Galicia nº 38, do 25 de febreiro), establecéronse as bases reguladoras das axudas aos plans de reestruturación e reconversión do viñedo en Galicia con vixencia indefinida.

Por Orde do 15 de marzo de 2010 (Diario Oficial de Galicia nº 58, do 26 de marzo) convocáronse para o ano 2010.

No artigo 8 da dita Orde do 15 de marzo de 2010, relativo ao financiamento destas axudas, detállase a aplicación orzamentaria e o importe económico previsto para elas. Este artigo prevé expresamente a posibilidade de incrementar a dotación orzamentaria contida na referida orde, polo que tendo en conta que o número de solicitudes presentadas superou as previsións realizadas por esta consellería, cómpre ampliar a dotación orzamentaria consignada inicialmente.

En consecuencia, de conformidade co disposto no artigo 30.I.3 do Estatuto de autonomía de Galicia, e no uso das facultades que me confire a Lei 9/2007, do 13 de xuño, de subvencións de Galicia,

DISPOÑO:

Artigo único.

1. Amplíase a dotación orzamentaria prevista na orde desta consellería, do 15 de marzo de 2010 (Diario Oficial de Galicia nº 58, do 26 de marzo), pola que se convocan para o ano 2010 as axudas aos plans de reestruturación e reconversión de viñedo en Galicia.

2. O incremento de dotación para o exercicio 2010 é de 3.000.000,00 euros, con cargo á aplicación orzamentaria 13.02.713-C 772.1 dos orzamentos da Comunidade Autónoma de Galicia para o ano 2010. Para exercicios futuros, con cargo á mesma aplicación orzamentaria 13.02.713-C 772.1, auméntase a dotación en 500.000,00 euros no exercicio 2011.

3. Tamén se poderán utilizar outros remanentes adicionais que poidan existir na mesma aplicación. En todo caso, a concesión das axudas aos plans de reestruturación e reconversión do viñedo en Galicia, estará condicionada á existencia de crédito axeitado e suficiente e limitarase ás dispoñibilidades orzamentarias.

4. Esta modificación non afecta o prazo que se establece para a presentación de solicitudes de axuda na devandita Orde do 15 de marzo de 2010.

Santiago de Compostela, 22 de setembro de 2010.

Samuel Jesús Juárez Casado

Conselleiro do Medio Rural