Dentro do programa de actividades que a Academia Galega de Seguridade Pública ten previsto realizar no ano 2010, e conforme as funcións atribuídas pola Lei 1/2007, do 15 de xaneiro, da Academia Galega de Seguridade Pública, anúnciase o desenvolvemento dun curso de capacitación para a escala técnica, na categoría de intendente principal dos corpos de policía local, segundo o previsto nos artigos 32.4º e 45 da Lei 4/2007, do 20 de abril, de coordinación das policías locais, e nos artigos 38 e 39 do Decreto 243/2008, do 16 de outubro, que deberá desenvolverse conforme as seguintes bases:
Obxectivos:
-Mellorar o compromiso profesional do servizo público aos cidadáns, baixo parámetros actitudinais de eficacia e de ética policial.
-Implicación nos procedementos e filosofías de xestión adecuados para acadar habilidades sociais e organizativas, que redunden nunha calidade do servizo e eficacia progresivas.
-Dotalos das ferramentas de coñecemento necesarias para a xestión directiva, e para a organización e estruturación adecuada dos recursos humanos e dos medios materiais de que dispoñan.
Destinatarios/as:
Persoal dos corpos de policía local que superaron o proceso selectivo para a categoría de intendente principal (anterior denominación de subinspector), e que non tivesen realizado este curso.
Inscrición:
A inscrición dos participantes será totalmente gratuíta.
Prazas:
Sen límite.
Solicitudes:
1. Os concellos deberán remitir un escrito á Academia Galega de Seguridade Pública, solicitando a participación no curso da/s persoa/s que se atopen nesta situación, e cubrir o anexo con todos os datos nel reflectidos, para efectuar a correspondente reserva de praza para a realización do devandito curso.
2. O prazo para a remisión de escritos rematará o día 29 de setembro de 2010.
3. Os escritos deberán enviarse á Academia Galega de Seguridade Pública, sita na avenida da Cultura, s/n, 36680 A Estrada. Remitiranse previamente por fax, ao número 886 20 61 22, para axilizar os correspondentes trámites.
Duración e contido:
O curso terá unha duración aproximada de dous meses (200 horas lectivas), e desenvolverase de modo semipresencial.
O deseño deste curso inclúe as seguintes áreas e módulos:
-Módulo I: habilidades de mando.
-Módulo II: estratexias directivas.
-Módulo III: comunicación externa e protocolo.
-Módulo IV: xestión administrativa.
-Módulo V: elaboración dun proxecto directivo segundo as normas establecidas pola dirección da academia.
A academia poderá proceder á homologación de materias ou módulos do curso cando, logo da solicitude do alumno e a oportuna xustificación documental, se acredite ter desenvolvido ou superado as ditas materias ou módulos en cursos ou actividades de centros ou institucións dependentes das administracións públicas, ou de recoñecido prestixio e solvencia noutro caso.
Datas:
A data definitiva de comezo do curso será o día 1 de outubro de 2010.
Desenvolvemento do curso:
Os alumnos da Academia Galega de Seguridade Pública durante o seu período de permanencia nesta, rexeranse polo seu Regulamento de réxime interior, publicado por Orde do 4 de febreiro de 2009, da Consellería de Presidencia, Administracións Públicas e Xustiza no DOG número 30, do 12 de febreiro de 2009.
Certificado:
Para obter o correspondente diploma será requisito indispensable superar todas as materias que figuren no programa. Unha vez superado este curso, a Agasp emitirá un informe certificando a dita superación, de modo que o concello de pertenza poida proceder ao nomeamento como persoal funcionario de carreira e á toma de posesión como intendente principal do corpo de policía local.
Modificacións:
A Academia Galega de Seguridade Pública poderá modificar o desenvolvemento normal do curso para adaptalo ás necesidades da Administración e ás continxencias que poidan xurdir.
A Estrada, 21 de setembro de 2010.
José Carlos García Bouzas
Director xeral da Academia Galega de Seguridade Pública
Ver referencia pdf "18600D006P013.PDF"