O Decreto 24/2008, do 21 de febreiro, regula os órganos estatísticos sectoriais da Administración da Comunidade Autónoma de Galicia e o procedemento para a súa designación. No punto 1 do seu artigo 2º establece que este órgano se integrará por unha ou varias unidades administrativas que se designarán por resolución da persoa titular do departamento no que se integre organicamente.

De conformidade co establecido nos artigos 1º, 2º, 3º e 7º do Decreto 24/2008, do 21 de febreiro,

DISPOÑO:

Primeiro.-Designar o Órgano Estatístico Sectorial da Consellería de Cultura e Turismo, que se integrará pola unidade administrativa cuxos datos a seguir se especifican:

a) Posto de traballo: Dirección do Instituto de Estudos Turísticos de Galicia.

b) Coordinadora ou coordinador: a persoa titular do posto de traballo que se designa.

c) Localización física: dependencias do Instituto de Estudos Turísticos de Galicia, na rúa Doutor Teixeiro 5, 4º, 15701, Santiago de Compostela.

Segundo.-Para os efectos do rexistro a que se refire o artigo 3º do Decreto 24/2008, do 21 de febreiro, o Instituto de Estudos Turísticos de Galicia comunicará ao Instituto Galego de Estatística os datos relativos á identidade da persoa que en cada momento ocupe o posto de traballo que se identifica no punto primeiro, que se nomeará seguindo os procedementos de provisión establecidos na normativa vixente.

Terceiro.-Formularase unha proposta de modificación da vixente relación de postos de traballo co obxecto de sinalar o carácter de órgano estatístico sectorial do devandito posto.

Santiago de Compostela, 29 de xullo de 2010.

Roberto Varela Fariña

Conselleiro de Cultura e Turismo