Dentro do plan de actividades da Escola Galega de Administración Pública (en diante, EGAP) para o ano 2010, e de acordo coas funcións atribuídas pola Lei 4/1987, do 27 de maio, de creación da escola, modificada pola Lei 10/1989, do 10 de xullo, convócase en colaboración coas universidades de Santiago de Compostela (USC) e da Autónoma de Barcelona (UAB), o Postgrao Interuniversitario Empresa e Emprego Público: un enfoque xurídico, económico e de valores (II edición).
Esta acción resulta de interese para a formación e o perfeccionamento das/os empregadas/os públicas/os, nos termos da Resolución do 19 de novembro de 2008, pola que se establece o procedemento e os requisitos de homologación de accións formativas por parte da EGAP.
O devandito curso desenvolverase de acordo coas seguintes bases:
Primeira.-Solicitantes.
Será un requisito necesario, para a realización deste curso, estar cursando ou ter finalizado os estudos universitarios na data da convocatoria.
Segunda.-Criterios de selección.
A selección das/os aspirantes será efectuada por unha comisión académica designada para este efecto, que terá en conta a titulación ou os estudos universitarios, os coñecementos previos adquiridos no ámbito do emprego público e/ou da empresa pública, e das relacións laborais nos anteditos medios, así como a experiencia profesional relacionada coa temática do curso; e se é o caso, realizarase unha entrevista persoal.
Terceira.-Características do curso.
Duración: 300 horas (150 horas presenciais e 150 virtuais).
Lugar: EGAP, situada no polígono das Fontiñas, rúa de Madrid, 2-4, 15707 Santiago de Compostela.
Datas: do 7 de outubro de 2010 ao 7 de xullo de 2011 (os xoves, pola tarde), en horario das 16.00 ás 20.00 horas.
Prazas: 35.
Dirección académica:
-USC: Dra. María Ángeles López Cabarcos.
-UAB: Dra. María José Feijóo Rey.
Profesorado:
Profesionais das distintas comunidades autónomas e de recoñecido prestixio nas materias que deben impartir.
Cuarta.-Obxectivos do curso.
O obxectivo perseguido polo curso é o de implicarse decididamente na formación para a dirección das administracións ou das empresas públicas no contexto de valores actual.
Este curso desenvolve unha acción específica de formación dos profesionais da empresa e do emprego público, onde a calidade é un factor horizontal, así como a formación nos temas xurídicos e de valores, utilizando ferramentas TIC.
Ademais, pretende facilitar unha potencial e eficaz cualificación profesional nun contorno actual condicionado pola sociedade da información e das novas tecnoloxías, facilitándolles ás/aos empregadas/os públicas/os a posibilidade dunha maior accesibilidade á actualización profesional que lles facilite conseguir maiores cotas de responsabilidade profesional.
O curso pretende:
-Facer accesible a formación de calidade na xestión e dirección na empresa e no emprego público, utilizando as TIC.
-Contribuír a formar o alumnado na concepción das administracións e das empresas públicas desde as ópticas económica, xurídica e de valores.
-Formar nas tecnoloxías como instrumento profesional.
-Favorecer a familiarización co contexto do e-learning para contribuír á implantación das TIC.
-Afondar no ámbito do coñecemento da empresa e do emprego público.
-Fomentar o respecto e a igualdade na actividade e no emprego público.
Metodoloxía:
A metodoloxía utilizada é mixta, combínase a teleformación coa formación presencial.
Quinta.-Contido.
O curso estrutúrase nos seguintes módulos:
Módulo I. Módulo de empresa.
1. Dirección da calidade.
2. Administración de empresas públicas e dirección de persoas.
3. Dirección comercial.
4. Comercio internacional.
5. Dirección financeira, análise e avaliación de proxectos.
6. A empresa.
Módulo II. Módulo xurídico e de valores.
1. Empresa e emprego público: escenario e coordenadas actuais.
2. Funcionario público versus contrato de traballo.
3. Dereito de traballo colectivo: sindical e empregados públicos.
4. O dereito procesual no emprego público.
5. A Seguridade Social: cuestións de actualidade.
6. A prevención de riscos laborais nas administracións públicas: cuestións xurídicas.
7. A empresa e o emprego público: posibles valores.
8. A prevención de riscos laborais: diversas vías de aproximación.
9. Políticas sociolaborais no marco da igualdade.
10. A educación: implicación da empresa e do emprego público na sociedade actual.
Sexta.-Destinatarias/os.
O programa do curso vai dirixido ás/aos empregadas/os públicas/os das administracións públicas galegas, aos profesionais e interesadas/os que pretendan acadar un maior coñecemento no ámbito da empresa e/ou das administracións públicas e das relacións laborais nos devanditos medios.
Sétima.-Pagamento da matrícula.
O importe da matrícula é de 2.500 euros.
O pagamento da taxa de matriculación deberá efectuarse dentro dos cinco días seguintes á comunicación por parte da dirección do curso da aceptación das/os alumnas/os no mesmo.
Oitava.-Prazo de inscrición e presentación de instancias.
O prazo para a inscrición finalizará o día 30 de setembro de 2010.
Para inscribirse, as persoas interesadas deberán enviar, simultaneamente, un curriculum vitae aos seguintes enderezos electrónicos:
angeles.lopez.cabarcos@usc.es e mariajose.feijoo@ uab.es, no que incluirán necesariamente:
-Fotocopia do DNI.
-Orixinal ou copia compulsada do título de diplomada/o ou licenciada/o, dos estudos e da experiencia profesional alegada.
-Documentación acreditativa dos méritos incluídos no curriculum.
Igualmente poderán dirixirse aos enderezos electrónicos sinalados anteriormente, para obter información sobre o curso; así como aos números de teléfono da USC (profra. López Cabarcos): 982 28 59 00 (ext. 24483) ou da UAB (profra. Feijóo Rey): 619 71 25 27 - 93 5812 277.
Santiago de Compostela, 7 de setembro de 2010.
Pablo Figueroa Dorrego
Director da Escola Galega de Administración Pública