Conforme o artigo 27.22º do Estatuto de autonomía, a Comunidade Autónoma galega ten a competencia exclusiva para a promoción deportiva e a axeitada utilización do lecer competencia en cuxo desenvolvemento, e no concreto ámbito das infraestruturas, a Lei 11/1997, do 22 de agosto, xeral do deporte de Galicia, establece que a Administración autonómica fomentará a construción e óptima utilización das instalacións deportivas, así como tamén planificará e executará, directamente ou en colaboración con outras administracións, á construción de instalacións deportivas propias ou a mellora das xa existentes no territorio de Galicia.
No exercicio desta competencia, e con data do 12 de febreiro de 2009 a Xunta de Galicia recibiu as obras do Centro Galego de Vela, sito no concello de Vilagarcía de Arousa, instalación esta que foi proxectada e executada pola Administración autonómica no obxecto de destinarse á formación, preparación e especialización dos deportistas galegos da modalidade deportiva de vela.
A Lei 11/1997, do 22 de agosto, xeral do deporte de Galicia, sinala, no artigo 32 letra d), que as federacións deportivas de Galicia posúen a competencia exclusiva para elaborar e desenvolver programas de promoción e desenvolvemento da súa modalidade deportiva, e establécese legalmente, así mesmo, que só se poderá recoñecer unha federación deportiva galega por cada modalidade deportiva (artigo 29).
Para o máis axeitado desenvolvemento dos procesos de tecnificación e rendemento deportivo en Galicia na modalidade deportiva da vela, é necesario contar, no Centro Galego de Vela, cunha fórmula de xestión que garanta a súa máxima rendibilidade deportiva, a través da aplicación de criterios e programas técnico-deportivos rigorosos, onde se garanta un contexto idóneo para o desenvolvemento e perfeccionamento dos deportistas no eido deportivo, pedagóxico, técnico, de utilización de instalacións e, en xeral, de todas as condicións que inciden na mellora da práctica deportiva.
Así mesmo, e xunto a esta prioridade cara á mellora da tecnificación e do rendemento da modalidade deportiva da vela de Galicia, faise necesario optimizar o centro cara a posibilitar o axeitado desenvolvemento dun programa deportivo da vela de base, que nutra aos programas de tecnificación e de rendemento existentes e futuros.
Polo exposto, e en uso das facultades que teño atribuídas pola lexislación vixente de aplicación,
DISPOÑO:
Artigo 1º.-Obxecto.
1.1. Mediante esta resolución, e de acordo co artigo 51 da Lei 3/1985, do 12 de abril, do patrimonio da Comunidade Autónoma galega, concédese un permiso de ocupación temporal da instalación de titularidade autonómica Centro Galego de Vela, a favor da Federación Galega de Vela nos termos previstos no artigo 2º desta resolución.
1.2. A finalidade será a de desenvolver nel os programas de iniciación, tecnificación, rendemento e alto nivel dos deportistas galegos desta modalidade deportiva co obxectivo de proxectalos á elite mundial do deporte da vela.
1.3. A concesión da ocupación temporal da instalación supón tamén o uso do seguinte equipamento:
-1 embarcación pneumática ASTEC 550 co nome Cenalren matrícula 8ªVILL3-3-09.
-1 carretilla elevadora H25D.
-1 embarcación 470.
-1 embarcación 49er.
-1 casco de embarcación Star.
-2 táboas RSX.
-Velas e mastros das embarcacións 470 e Star.
-80 embarcacións optimist de plástico.
-15 embarcacións omegas.
1.4. Así mesmo, a Secretaría Xeral para o Deporte faculta a Federación Galega de Vela para realizar os trámites administrativos necesarios para o axeitado funcionamento da instalación e do equipamento propiedade desta secretaría xeral; entre outros: matriculación de embarcacións, contratos de auga, de electricidade e de telefonía.
1.5. As actuacións que realice a federación en virtude desta resolución en ningún caso supoñen autorización ningunha para a realización de obras de adecuación, mellora, estruturais ou de calquera outro tipo no centro.
Artigo 2º.-Condicións de exercicio do permiso de ocupación en relación á xestión da instalación.
A Federación Galega de Vela xestionará o Centro Galego de Vela achegando os medios necesarios, económicos, técnicos e humanos, para o óptimo desenvolvemento das actividades e programas que se realicen no centro (deixando a salvo o previsto no artigo 1.3º) e, en todo caso, baixo a supervisión da Secretaría Xeral para o Deporte. A xestión obxecto desta resolución deberaa realizar a federación de forma directa, e ten un alcance exclusiva, e unicamente, deportivo.
A xestión da instalación levarase a cabo tendo en conta as seguintes condicións:
a) A instalación estará aberta os 7 días da semana, co seguinte horario mínimo:
Horario de inverno: das 10.00 ás 18.30 horas.
Horario de verán (do 15 xuño ao 15 setembro): das 10.00 ás 20.00 horas.
b) A instalación poderá ser utilizada polos seguintes colectivos:
-Deportistas dos programas de tecnificación, rendemento e elite da Federación Galega de Vela e da Federación Española de Vela.
-Deportistas participantes en estadías de grupos de tecnificación, rendemento e elite doutras comunidades autónomas e países.
-Deportistas participantes en competicións deportivas oficiais.
-Poboación escolar galega que participe en programas de promoción da vela desenvolvidos pola FGV.
-Alumnos dos cursos das formacións deportivas oficiais.
c) A FGV deberá dotar o centro, polo menos, do seguinte persoal: 1 director técnico-xerente, 1 adestrador e 1 encargado do mantemento da instalación.
d) O persoal que desenvolverá as actividades da Federación Galega de Vela deberá ter unha relación contractual axustada á lei.
e) A Federación Galega de Vela deberá subscribir unha póliza de seguro que cubra os danos que poida sufrir a instalación así como unha póliza de responsabilidade civil que cubra os danos producidos polo desenvolvemento da actividade.
Artigo 3º.-Vixencia.
Esta resolución entrará en vigor desde o momento da súa sinatura, e tendo en conta que os permisos de ocupación temporal levan implícita a cláusula de precariedade, o permiso de ocupación poderá ser revogado en calquera momento pola Administración, sen que o interesado teña dereito a indemnización ningunha (artigo 53 da Lei 3/1985), non obstante, a Administración deberá comunicar, de forma fidedigna, á Federación Galega de Vela a revogación do permiso de ocupación temporal cunha antelación de tres meses.
En calquera caso, será causa de extinción do permiso de ocupación o incumprimento de calquera das condicións previstas nesta resolución ou na normativa vixente.
Esta resolución entrará en vigor o día seguinte ao da súa publicación no Diario Oficial de Galicia.
Santiago de Compostela, 6 de setembro de 2010.
José Ramón Lete Lasa
Secretario xeral para o Deporte